རྒྱ་ནག་གིས་བོད་བྱང་རྒྱུད་ཀྱི་གནམ་མཚོ་ཕྱུག་མོ་ས་དོང་འབྲུས་ནས་བསྔོགས་ཡོད་པ་རེད།

མའོངས་པར་ཁོར་ཡུག་འགྱུར་ལྡོག་དང་འབྲེལ་བའི་ཤུགས་རྐྱེན་ཇི་འདྲ་ཐེབས་མིན་སྐོར་ཉམས་ཞིབ་བྱེད་པར་ཕན་ཐོགས་ཡོང་རྒྱུ་ཡིན་པ་བརྗོད་འདུག

ཉེ་ཆར་རྒྱ་ནག་གཞུང་འབྲེལ་གསར་ལས་ཁང་གིས་སྤེལ་བའི་གནས་ཚུལ་ནང་།  རྒྱ་ནག་གིས་སྣེ་ཁྲིད་པའི་རྒྱལ་སྤྱིའི་ས་ཁམས་ཚན་རིག་ཞིབ་འཇུག་ཚོགས་པ་ཞིག་གིས་ཉིན་གྲངས་ ༤༢ རིང་བོད་མཐོ་སྒང་གི་མཚོ་ཆེ་གྲས་བྱང་གནམ་མཚོ་ཕྱུག་མོའི་མཚོ་སྙིང་དུ་ས་དོང་བདུན་ཙམ་འབྲུས་ནས་སྤྱི་ཟླ ༧པའི་ཚེས་༡༨ཉིན་ལས་དོན་གྲུབ་ཟིན་ཡོད་པ་རེད་།མཚོ་དེ་བསྔོགས་ནས་མཚོའི་གཏིང་རིམས་ནས་རིང་ཚད་ལ་མི་ཌར་ ༩༥༡ ཙམ་ཡོད་པའི་འོག་ཏུ་སྐྱེ་དངོས་ཀྱི་ངོ་བོ་འགྱུར་བའི་གནའ་སྔ་མོའི་གཏེར་རྫས་རིགས་འདྲ་མིན་མང་པོ་ཞིག་བསྔོག་འདོན་བྱས་ཡོད་པ་དང།   མཚོ་གཏིང་ནས་བསྔོག་འདོན་བྱས་པའི་མནའ་རྫས་ཀྱི་འདྲ་དཔེ་དེ་དག་གི་ཐོག་ནས་དེ་སྔ་སྐལ་པ་མང་པོའི་གོང་དུ་བོད་མཐོ་སྒང་གི་གནམ་གཤིས་དང་ཁོར་ཡུག་གི་གྱུར་ལྡོག་ཇི་འདྲ་བྱུང་ཡོད་པ་ཤེས་རྟོགས་ཐུབ་རྒྱུ་ཡིན་པ་མ་ཚད།  དེ་བཞིན་དེ་སྔ་སྐལ་པ་མང་པོའི་གོང་དུ་བོད་ཀྱི་མཚོ་ཁུལ་དེ་དག་ནང་སྐྱེ་དངོས་སྲོག་ཆགས་ག་འདྲ་གནས་ཡོད་མེད་དང་མ་འོངས་པར་ཁོར་ཡུག་འགྱུར་ལྡོག་དང་འབྲེལ་བའི་ཤུགས་རྐྱེན་ཇི་འདྲ་ཐེབས་མིན་སྐོར་ཉམས་ཞིབ་བྱེད་པར་ཕན་ཐོགས་ཡོང་རྒྱུ་ཡིན་པ་རྒྱ་ནག་གི་ཚན་རིག་ཉམས་ཞིབ་དེ་དག་གི་སྙན་ཐོའི་ནང་བཀོད་ཡོད་པ་རེད་འདུག  

རྒྱལ་སྤྱིའི་བོད་རིག་པའི་ཞིབ་འཇུག་པ་དང་དེང་སྐབས་བོད་བྱང་ཐང་གི་ལོ་རྒྱུས་ཉམས་ཞིབ་འཚོལ་བསྡུ་བ། བྱང་ཐང་གི་ཕོ་ཉ་ཟེར་བའི་རྩོམ་བྲིས་པ་དང་ཉམས་ཞིབ་པ། གནམ་མཚོའི་སྐོར་རྒྱུས་མངའ་ཆེ་བ་ནག་ཆུ་བློ་བཟོད་ལགས་སུ་རྒྱ་ནག་གི་ཚན་རིག་ཉམས་ཞིབ་པས་བོད་ཀྱི་བྱང་གནམ་མཚོ་ཕྱུག་མོའི་མཚོ་སྙིང་འབྲུས་ནས་ཉམ་ཞིབ་བྱེད་པ་དེར་གཟིགས་ཚུལ་ཇི་ཡོད་གནས་འདྲི་ཞུ་སྐབས།  ཁོང་གིས་དེ་ནི་བོད་མིའི་ཆོས་ལུགས་དད་མོས་ལ་བརྩིས་མེད་བཏང་བ་ཞིག་དང་བོད་མིའི་སེམས་ཁམས་དང་ཁོར་ཡུག་ལ་གནོད་སྐྱོན་བཏང་པ།  ཡུལ་སྐོར་སྤྲོ་འཆམ་གྱི་ཐོག་ནས་རྒྱ་ནག་གིས་དཔལ་འབྱོར་གྱི་ཁེ་ཕན་ལེན་ཐབས་དང་མཚོ་དེ་ནས་རྩ་ཆེའི་གཏེར་ཁ་སྔོག་འདོན་བྱེད་ཐབས་ཡིན་པའི་སྐོར་འགྲེལ་བརྗོད་གནང་གི་འདུག    བོད་ཀྱི་བྱང་གནམ་མཚོ་ནི་བོད་ཀྱི་རྒྱལ་ས་ལྷ་ས་ནས་བྱང་ཕྱོགས་སུ་རྒྱང་ཐག་ཀི་ལོ་མི་ཊར་ ༡༠༠ ཙམ་གྱི་སར་ནག་ཆུ་ས་ཁུལ་དུ་ཆགས་ཡོད་པ་དང་།  བོད་ཀྱི་མཚོ་ཆེ་ཤོས་དང་གཏིང་ཟབ་ཤོས་གྲས་ཤིག་ཡིན་ལ། མཚོ་དེ་རྒྱ་མཚོ་ནས་བརྩིས་ན་མཐོ་ཚད་མི་ཊར་ ༤༧༠༠ ཙམ་གྱི་སར་ཆགས་ཡོད་པ་དང་། གཏིང་ཚད་མི་ཊར་བརྒྱ་ཙམ་དང་། མཐའ་སྐོར་རིང་ཚད་སྤྱི་ལེ་ ༣༡༨ ཡོད་པ་དང། མཚོའི་ནང་མཐོ་སྒང་ཉ་གཅེར་བུ་དང་།  མཚོ་མཐའ་རུ་ཆུ་བྱ་དང་ངང་པ་སོགས་བྱ་བྱེའུ་རིགས་སྣ་ཚོགས་འདུས་གནས་ཞིག་ཡིན་པའི་ཆེས་མཐོ་བའི་སྐམ་ས་ཆེན་མོའི་ཚྭ་མཚོ་ཆེ་གྲས་ཤིག་ཀྱང་ཡིན་པ་དང་།  བོད་མི་ཚོས་ལོ་ངོ་སྟོང་ཕྲག་མང་པོའི་རིང་མཚོ་དང་མཚེའུ།  རི་དང་གནའ་བོའི་ཤུལ་རྗེས་ཡོད་པའི་ས་ཚིགས་ཁག་ལ་གཏོར་སྐྱོན་མི་གཏོང་བ་ནི་ཡུལ་གོམས་གཤིས་ལུགས་ཞིག་ཡིན་པར་གནད་དོན་དབྱེ་ཞིབ་པ་ཚོས་ངོས་འཛིན་བྱེད་ཀྱི་ཡོད་པ་རེད།།

གསར་འགོད་པ། ཚེ་དབང་ནོར་བུ། ལྷུན་གྲུབ་ཚེ་རིང་།

རྩོམ་སྒྲིག་འགན་འཛིན། རྡོ་རྗེ་དགྲ་འདུལ།

དྲྭ་ཐོག་རྩོམ་སྒྲིག་པ།  བཀྲིས་དབང་ཕྱུག

དྲྭ་ཐོག་སྤེལ་མཁན། ནོར་སྡེ་སྒྲོལ་མ།