སྲིད་སྐྱོང་མཆོག་གིས་དབྱིན་ཡུལ་གྱི་(Oxford Union)་གླེང་སྟེགས་ཐོག་བོད་དོན་གཏམ་བཤད་གནང་འདུག

དེ་ཡང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ནུབ་ཕྱོགས་ཡུལ་གྲུ་དབྱིན་ཡུལ་དང་། ཨ་མི་རི་ཀ ཁེ་ན་ཌ་བཅས་ནང་གཞུང་འབྲེལ་ཕྱོགས་ཕེབས་འགོ་བཙུགས་ཡོད་པ་བཞིན་ཚེས་༣༡ཉིན་དབྱིན་ཡུལ་དུ་འབྱོར་ཡོད་པ་དང་། ཚེས་༣༡ཉིན་དབྱིན་ཇིའི་རྒྱལ་ས་ལོན་ཌོན་ནང་ཡོད་པའི་དབྱིན་ཇིའི་སྦི་སྦི་སི་(BBC)་དང་གསར་འགྱུར་བརྒྱུད་ལམ་ཁག་གཉིས་ཙམ་གྱི་བཅར་འདྲི་དང་ལེན་གནང་བ་དང་། ཁུལ་དེར་རྟེན་གཞི་བྱས་པའི་སློབ་སྟོན་ལྟེ་གནས་ཁང་གི་མཁས་དབང་དང་གཞན་ཡང་གཞུང་འབྲེལ་གནད་དོན་མི་སྣ་དང་མཇལ་མོལ། དེ་ནས་རྒྱལ་ས་ལོན་ཌོན་ནང་ཡོད་པའི་གྲགས་ཆེ་བའི་ དབྱིན་ཇིའི་(Oxford)་གཙུག་ལག་སློབ་ཆེན་གྱི་ཁོངས་གཏོགས་(Oxford Union)་གླེང་སྟེགས་ཀྱིས་གདན་ཞུ་གནང་བ་ལྟར་ཕེབས་ནས་བོད་དོན་གཏམ་བཤད་གནང་ཡོད་པ་དང་མཉམ། གཙུག་ལག་སློབ་གྲྭ་དེའི་འགན་འཛིན་མི་སྣ་ཁག་ཅིག་དང་མཇལ་མོལ་དང་། གཙུག་ལག་སློབ་གྲྭ་དེའི་ནང་ཡོད་པའི་བོད་པའི་སློབ་ཕྲུག་དང་། ས་གནས་བོད་མི་རྣམས་དང་མཇལ་མོལ་གནང་ཡོད་པ་དབྱིན་ཡུལ་བོད་ཀྱི་སྐུ་ཚབ་དོན་གཅོད་ལས་ཁང་གི་དྲུང་ཆེ་བློ་བཟང་ཆོས་སྒྲོན་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ངོ་སྤྲོད་གནང་བྱུང་།
ད་རེས་སྲིད་སྐྱོང་མཆོག་དབྱིན་ཡུལ་ནང་གི་གཞུང་འབྲེལ་ཕྱོགས་ཕེབས་དེ་ནི་སྲིད་སྐྱོང་སྤེན་པ་ཚེ་རིང་ལགས་ཀྱིས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་གི་ཐུགས་འགན་བཞེས་བ་ནས་ཁུལ་དེའི་ནང་གཞུང་འབྲེལ་ཕྱོགས་ཕེབས་གནང་བ་ཐོག་མ་དེ་ཆགས་ཀྱི་ཡོད་པ་རེད།
རྩ་བའི་(Oxford Union)་ཞེས་པ་ནི་འཛམ་གླིང་ནང་ཕུལ་དུ་བྱུང་བའི་མི་སྣ་ཚོའི་བགྲོ་གླེང་གནང་སའི་སྡིངས་ཆ་ཞིག་ཡིན་པ་དང་། སྤྱི་ལོ་༡༩༢༣ནས་བཟུང་ད་བར་ཚོགས་པ་དེའི་ངོས་ནས་སྨྲ་བརྗོད་རང་དབང་གཞི་ལ་བཟུང་བའི་ཐོག་འཛམ་གླིང་ནང་སྙན་གྲགས་ཆེ་བའི་ཆབ་སྲིད་མི་སྣ་དང་། མཁས་དབང་། སྒྱུ་རྩལ་བ། ཕུལ་དུ་བྱུང་བའི་གཏམ་བཤད་པ། རྩེད་འགྲན་པ་གྲགས་ཅན། ཚོང་པ་གྲགས་ཅན་ལ་སོགས་ཆེས་གྲགས་ཆེ་བའི་མི་སྣ་ཁག་གདན་ཞུས་ཀྱིས་གཏམ་བཤད་དང་བགྲོ་གླེང་གོ་སྒྲིག་ཞུས་གནང་བཞིན་ཡོད་པ་ལྟར། དེ་སྔ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དང་། སྲིད་སྐྱོང་ཟུར་པ་བློ་བཟང་སེང་གེ་ལགས་བཅས་ཀྱང་གདན་ཞུས་ཀྱིས་བོད་དོན་གསུང་བཤད་གནང་མྱོང་ཡོད་པ་རེད།
སྲིད་སྐྱོང་སྤེན་པ་ཚེ་རིང་ལགས་ཀྱིས་ཉིན་གྲངས་གཉིས་རིང་དབྱིན་ཡུལ་ནང་གཞུང་འབྲེལ་ཕྱོགས་ཕེབས་རྗེས། ཕྱི་ཟླ་གཉིས་པའི་ཚེས་༡ཉིན་ཨ་མི་རི་ཀའི་ནང་ཕེབས་གཞུང་འབྲེལ་ཕྱོགས་ཕེབས་གནང་ནས། ཨ་མི་རི་ཀའི་སྲིད་གཞུང་གི་གནད་དོན་མི་སྣ་ཁག་ཅིག་དང་མཇལ་འཕྲད་དང་། དེ་བཞིན་ཨ་མི་རི་ཀའི་ནང་ཡོད་པའི་བོད་མི་གནས་ཡུལ་ས་གནས་ཁག་ཅིག་ཏུ་གཞུང་འབྲེལ་ཕྱོགས་ཕེབས་ཀྱིས་བོད་མི་ཚོ་དང་མཇལ་མོལ་གནང་རྒྱུ་ཡིན་པ་བྱང་ཨ་མི་རི་ཀའི་སྐུ་ཚབ་དོན་གཅོད་འབུམ་རམ་པ་རྣམ་རྒྱལ་ཆོས་གྲུབ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ངོ་སྤྲོད་གནང་བྱུང་།

གསར་འགོད་པ། དབྱངས་སྒྲོན།
རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།