ལྕམ་སུའུ་ཆི་མཆོག་གིས་དབྱིན་ཇིའི་གྲོས་ཚོགས་ནང་གསུང་བཤད།

༄༅༎འབར་མའི་མང་གཙོ་ཚོགས་པའི་ཚོགས་གཙོ་ལྕམ་ཨང་སན་སུའུ་ཆི་མཆོག་དབྱིན་ཇིའི་གྲོས་ཚོགས་ནང་གསུངས་བཤད་གནང་འཆར་ཡོད་འདུག

དེ་ཡང་ལྕམ་ཨང་སན་སུའུ་ཆི་མཆོག་ལོ་ངོ་ཉི་ཤུ་རྩ་བཞི་ལྷག་ཙམ་གྱི་རྗེས་སུ་དབྱིན་ཡུལ་དུ་ཕེབས་འབྱོར་གྱིས་ཁུལ་དེའི་སྙན་གྲགས་ཅན་གྱི་ཨོཀ་སེ་ཕོདྲ་གཙུག་ལག་སློབ་གཉེར་ཁང་ནས་ཆེ་བསྟོད་ཀྱི་གཟེངས་རྟགས་འབུལ་བཞེས་གནང་བ་དང་། དེ་བཞིན་འབྲེལ་ཡོད་མི་སྣ་མང་པོ་ཞིག་མཇལ་འཕྲད་གནང་ཡོད་རེད་ལ་སྲིད་བློན་ཀེམ་རོན་མཆོག་དང་ཡང་མཇལ་འཕྲད་གནང་རྒྱུ་ཡིན་འདུག

ཁ་ས་རེས་གཟའ་ལྷག་པའི་ཉིན་ཨོཀ་སེ་ཕོདྲ་གཙུག་ལག་སློབ་གཉེར་ཁང་ནས་ཆེ་བསྟོད་ཀྱི་གཟེངས་རྟགས་འབུལ་བའི་སྐབས་ཁོང་གིས། ལོ་ངོ་མང་པོའི་རིང་བཟང་བཙོན་དུ་གནས་པའི་རིང་གཙུག་ལག་སློབ་གཉེར་ཁང་འདིའི་ནང་དུས་ཚོད་བསྐྱལ་བ་རྣམས་དྲན་གསོ་བྱེད་ཀྱི་ཡོད་པ་དང་། དེས་དཀའ་ངལ་ལ་གདོང་ལེན་བྱེད་རྒྱུར་ཕན་ཐོགས་བྱུང་། ད་རེས་དངོས་སུ་འདིར་བཅར་རྒྱུའི་སླར་ཡང་གོ་སྐབས་བྱུང་བར་དགའ་སྐྱོ་གཉིས་ཀ་བྱུང་ཞེས་གསུངས་ཡོད་འདུག ལྕམ་ཨང་སན་སུའུ་ཆི་མཆོག་བཟང་བཙོན་དུ་མ་བཞུགས་གོང་ལོ་ངོ་མང་པོ་ཞིག་ཁོང་གི་སྐུ་ཟླ་འདས་པོ་དང་སྲས་གཉིས་ཀྱི་མཉམ་དབྱིན་ཡུལ་དང་ལྷག་པར་དུ་གཙུག་ལག་སློབ་གཉེར་ཁང་འདིའི་ནང་བཞུགས་ཡོད་པ་དང་། དེའི་གོང་གཙུག་ལག་སློབ་གཉེར་ཁང་འདིའི་ནང་སློབ་སྦྱོང་ཡང་གནང་མྱོང་ཡོད་པ་བཅས་ཀྱི་ཆ་ནས་དབྱིན་ཡུལ་དེ་བཞིན་ཁོང་གི་ནང་ཁྱིམ་གཉིས་པ་ལྟབུ་ཞིག་ཆགས་ཡོད་པ་རེད། དེ་རིང་རེས་གཟའ་ཕུར་བུའི་ཉིན་དབྱིན་ཇིའི་གྲོས་ཚོགས་གོང་འོག་གཉིས་ཀའི་ནང་གསུངས་བཤད་གནང་གི་ཡོད་པ་དང་། དེ་ནི་ཁོང་ལ་ཆེ་བསྟོད་ཆེན་པོ་ཞུས་པ་ཞིག་ཀྱང་མཚོན་གྱི་ཡོད་འདུག ཡང་བདུན་ཕྲག་འདིའི་རེས་གཟའ་མིག་དམར་ཉིན་ཁོང་དགུང་གྲངས་དྲུག་བཅུ་རེ་བདུན་ལ་ཕེབས་པའི་འཁྲུངས་སྐར་དུས་ཆེན་ཡང་ཨོཀ་སེ་ཕོདྲ་གྱི་ཡན་ལག་སློབ་གྲོགས་ཟུར་པ་ཚོས་གོ་སྒྲིག་ཞུས་ཡོད་པ་མ་ཟད་སྦི་སྦི་སི་བརྙན་འཕྲིན་ནས་ཀྱང་ཁོང་ལ་བཅར་འདྲི་ཞུས་ཡོད་པ་བཅས་དབྱིན་ཡུལ་ནང་ལྕམ་ཨང་སན་སུའུ་ཆི་མཆོག་ལ་ཕྱོགས་གང་ས་ནས་ཕེབས་བསུ་ཟབ་རྒྱས་ཞུས་ཡོད་པ་རེད།