བསྟན་འཛིན་ཆོས་རྒྱལ་ལགས་ཀྱི་བར་དོ་འོད་སྡེར་སྙན་གྲགས་ཆེ་བའི་གཟེངས་རྟགས་འོས་གཞིར་བདམས།

ཨོསུ་ཀྲེ་ལི་ཡའི་ནང་གནས་བཞུགས་བོད་ཀྱི་གླུ་པ་གྲགས་ཅན་བསྟན་འཛིན་ཆོས་རྒྱལ་ལགས་ཀྱིས་བཏང་གནང་བའི་བར་དོ་ཞེས་པའི་གླུ་གཞས་འོད་སྡེར་དེ་(Grammy)ཞེས་སྙན་གྲགས་ཆེ་བའི་གཟེངས་རྟགས་ཀྱི་འོས་གཞིར་བདམས་འདུག
དེ་ཡང་བསྟན་འཛིན་ཆོས་རྒྱལ་ལགས་ཀྱིས་ངོ་དེབ་བརྒྱུད་གནས་ཚུལ་སྤེལ་དོན་ལྟར་ན། ཁོང་གི་བཏང་གནང་བའི་བར་དོ་ཞེས་པའི་གླུ་གཞས་འོད་སྡེར་དེ་(Grammy)ཞེས་པའི་ཨ་རིའི་གླུ་གཞས་རོལ་དབྱངས་ཀྱི་གཟེངས་རྟགས་སྙན་གྲགས་ཅན་ཀྱི་ཁྲོད། དུས་རབས་གསར་བའི་འོད་སྡེར་ལེགས་ཤོས་(Best new age album)ཁོངས་སུ་མིང་འདོན་གནང་ཡོད་པ་དང་།
གནས་ཚུལ་ཡག་པོ་དེ་གོ་ཐོས་བྱུང་བ་དེར་སྤྲོ་སེམས་འཁོལ་བའི་དགའ་ཚོར་ཆེན་པོ་བྱུང་བ་དང་། ཆེ་བསྟོད་དེ་འདྲ་གནང་བར་བཀྲིན་བསམ་ཤེས་ཞུ་རྒྱུ་ཡིན་ཞེས་དང་། བར་དོ་ཞེས་པའི་གླུ་གཞས་འོད་སྡེར་དེ་ནི་ཁོང་ལ་ཐུགས་ཐག་ཉེ་པོ་ཡོད་པ་དང་། དེ་ནི་བརྩེ་བ་ཆེན་པོའི་སྒོ་ནས་བཟོ་བསྐྲུན་གནང་བ་དང་། གྲོགས་པོ་ཡག་པོ་མང་པོས་རྒྱབ་སྐྱོར་གནང་བ་སོགས་ཀྱི་འོག་ཕབ་བསྐྲུན་གནང་བ་ཞིག་ཡིན་སྟབས། དེ་ཡིས་སེམས་ཅན་ཐམས་ཅད་ལ་ཕན་ཐོགས་ཡོང་བའི་སྨོན་ལམ་ཞུས་གནང་འདུག
བར་དོ་གླུ་གཞས་འོད་སྡེར་དེ་ཨོསུ་ཀྲེ་ལི་ཡའི་(Australia)ཡི་(Brisbane)གྲོང་ཁྱེར་དུ་གནས་སྡོད་བོད་མི་བསྟན་འཛིན་ཆོས་རྒྱལ་ལགས་དང་། རོགས་པ་(Laurie Anderson)ལགས། (Jesse Paris Smith) ལགས་བཅས་མཉམ་འབྲེལ་གྱིས་འདོན་སྤེལ་གནང་བ་ཡིན་འདུག
རྒྱལ་སྤྱིའི་ཁྲོད་སྙན་གྲགས་ཆེ་བའི་(Grammy Awards)་ཞེས་བ་ནི། ཨ་རིའི་རོལ་དབྱངས་ཚོགས་སྡེ་(the Recording Academy)ཡིས་སྤྲོད་བཞིན་པ་སྤྱི་ལོ་༡༩༥༩ནས་འགོ་བཙུགས་པ་དང་། ད་སྐབས་གཟེངས་རྟགས་དེ་སྙན་གྲགས་ཆེ་བ་འཛམ་གླིང་གི་རོལ་དབྱངས་དུས་སྟོན་དང་རོལ་དབྱངས་གཟེངས་རྟགས་ཆེ་ཤོས་ཞིག་ཡིན།