༧གོང་ས་མཆོག་གིས་ཚང་མར་ཐུཊ་རྗེ་ཆེ་ཞེས་གསུང་འཕྲིན་བསྩལ་འདུག

སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་སྐུའི་འཁྲུངས་སྐར་ལ་འཚམས་འདྲི་ཞུ་མཁན་ཚང་མར་ཐུགས་རྗེ་ཆེ་ཞུའི་གསུང་འཕྲིན་བསྩལ་འདུག
དེ་ཡང་འདི་ཚེས་༨་ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་གང་ཉིད་ཀྱི་སྐུའི་འཁྲུངས་སྐར་ཉིན་འཛམ་གླིང་ཁྱོན་ཡོངས་ནས་འཚམས་འཕྲིན་ཕུལ་བ་དང་། དེ་བཞིན་འཁྲུངས་སྐར་སྲུང་བརྩི་ཞུས་གནང་བ་བཅས་ལ་ཐུགས་རྗེ་ཆེ་ཞུའི་གསུང་འཕྲིན་ཞིག་རྩལ་གནང་ཡོད་པ་དང་། གོང་ཞུས་གསུང་འཕྲིན་དེའི་ནང་། ༧གོང་ས་མཆོག་གིས་ཚང་མས་ཤེས་གསལ་ལྟར། ངོས་རང་གི་མི་ཚེའི་ནང་དམ་བཅའ་འམ་འགན་འཁུར་གསུམ་ཡོད་པ་ནི། འགྲོ་བ་མི་ལ་གཅིག་མཚུངས་ཀྱི་བདེ་སྐྱིད་བསྐྲུན་ཐབས་སུ་འཛམ་གླིང་འདིའི་ནང་བྱམས་བརྩེ་གོང་འཕེལ་གཏོང་ཐབས་གནང་རྒྱུ་དང་། གཉིས་པ་ནི་ཆོས་ལུགས་མཐུན་འབྲེལ་ཡོང་ཐབས་སུ་ཕན་ཚུན་དབར་འཆམ་མཐུན་གནས་ཐབས་གནང་རྒྱུ། ཡང་༧གོང་ས་སྐྱབས་མགོན་ཆེན་པོ་མཆོག་གང་ཉིད་བོད་མི་ཞིག་ཡིན་པའི་ཆ་ནས་འཚེ་མེད་ཞི་བ་དང་ཞི་བདེ་དང་ལྡན་པའི་བོད་ཀྱི་ཆོས་དང་རིག་གཞུང་འཛིན་སྐྱོང་སྤེལ་གསུམ་གནང་རྒྱུ། དེ་བཞིན་མཐོ་སྒང་བོད་འདི་བཞིན་ཨེ་ཤེ་ཡའི་རྒྱལ་ཁབ་ཀྱི་མི་མང་ཐེར་འབུམ་གཅིག་ལྷག་ཙམ་གྱི་ཆུ་བོའི་ཡོངས་ཁུངས་གཙོ་བོ་ཞིག་ཆགས་ཀྱི་ཡོད་སྟབས་དེ་དག་སྲུང་སྐྱོབ་གནང་རྒྱུ་བཅས་ཀྱི་ཐུགས་དགོངས་རྣམས་ལུང་འདྲེན་གནང་སྟེ། དགོངས་གཞི་དེ་དག་འགྲུབ་ཐབས་སུ་༧གོང་ས་མཆོག་སྐུ་ཉིད་ནས་ཐུགས་འགན་བཞེས་གནང་གི་ཡོད་པ་ལྟར་རྒྱུན་གཏན་ནས་༧གོང་ས་མཆོག་ལ་གུས་བརྩི་ཞུ་མཁན་ཚང་མས་འཕྱར་གྲུ་མཉམ་འདེགས་གནང་སྐྱོང་ཡོང་བའི་འབོད་སྐུལ་ཞུ་གི་ཡོད་ཅེས་བཀའ་གནང་ཡོད་འདུག
ཡང་གསུང་འཕྲིན་ནང་མུ་མཐུད་ནས། བོད་ཀྱི་ནང་ཆོས་ནི་གནའ་བོའི་རྒྱ་གར་གྱི་དཔལ་ན་ལན་དྲའི་གཙུག་ལག་སློབ་གཉེར་ཁང་ནས་དར་བའི་རྒྱུ་མཚན་དང་བརྟག་དཔྱད་ཀྱི་ལམ་ལ་གཞི་བཅོལ་བའི་བསླབ་གཞི་ཞིག་ཡིན་པ་དང་། དེ་དག་དེང་དུས་ཚན་རིག་དང་ཡང་མཐུན་པ་ཞིག་ཆགས་ཀྱི་ཡོད་པ་སོགས་བཀའ་གནང་ནས་གང་ལྟར་རང་ཉིད་ཀྱི་མི་ཚེའི་ནང་གཞན་ལ་ཕན་ཐོགས་བྱེད་རྒྱུ་སྐུལ་སློང་དང་སྤྱོད་པ་འཁྱེར་དགོས་རྒྱུ་དང་གལ་སྲིད་དེ་ལྟར་མ་བྱུང་བ་ཡིན་ནའང་གཞན་ལ་གནོད་པའི་ལས་མ་བྱེད་རོགས་ཞེས་འབོད་སྐུལ་གནང་རྒྱུ་ཡིན་ཞེས་བཀའ་གནང་བ་བཅས་སྐུའི་འཁྲུངས་སྐར་ལ་འཚམས་འདྲི་དང་དགའ་སྟོན་ཞུ་མཁན་བོད་ཕྱི་ནང་ཙམ་མ་ཡིན་པར་ཕྱིའི་མི་རིགས་བཅས་ཚང་མར་ཐུགས་རྗེ་ཆེ་གསུངས་གནང་ཡོད་པ་རེད།།

གསར་འགོད་པ་རིག་འཛིན་ཆོས་སྒྲོན།