ཨ་རིའི་ཨེ་མོ་རི་གཙུག་ལག་སློབ་ཆེན་ནང་བོད་ཀྱི་བདུན་ཕྲག་ཅེས་པའི་དུས་སྟོན་སྲུང་བརྩི་ཞུ་བཞིན་འདུག

ཨ་རིའི་ཨེ་མོ་རི་གཙུག་ལག་སློབ་ཆེན་ནང་བོད་ཀྱི་བདུན་ཕྲག་ཅེས་པའི་དུས་སྟོན་སྲུང་བརྩི་ཞུ་བཞིན་པ། ༢༠༢༤ ཟླ་ ༩ ཚེས་ ༣

ཨ་མི་རི་ཀའི་ཨེཊ་ལེན་ཊཱ་ (Atlanta) གྲོང་ཁྱེར་ནང་རྟེན་གཞི་བྱས་པའི་ཨེ་མོ་རི་(Emory)་གཙུག་ལག་སློབ་ཆེན་དུ་ཕྱི་ཟླ་ ༩ ཚེས་ ༣ ནས་༦ བར་གྱི་ཉིན་གྲངས་བཞི་རིང་ཕྱི་ལོ་ ༢༠༢༤ ལོའི་བོད་ཀྱི་བདུན་ཕྲག་ཅེས་པའི་དུས་སྟོན་སྲུང་བརྩི་ཞུ་བཞིན་པ་དང་། ད་ལོའི་བོད་ཀྱི་བདུན་ཕྲག་ཅེས་པའི་དུས་སྟོན་དེ་བཞིན་ཕྱི་ཟླ་དགུ་པའི་ཚེས་༣ཉིན་ཨེ་མོ་རིའི་ མཡེ་ཀལ་ ཁར་ལོསི་ (Michael Carlos) འགྲེམས་སྟོན་ཁང་དུ་དབུ་འབྱེད་གནང་འདུག
དབུ་འབྱེད་མཛད་སྒོ་དེ་བཞིན་ཨེ་མོ་རི་གཙུག་ལག་སློབ་གཉེར་ཁང་གི་སེམས་ཁམས་ཚན་རིག་དང་སྙིང་རྗེ་ལ་བརྟེན་པའི་ཀུན་སྤྱོད་ལྟེ་གནས་ཁང་གི་འགན་འཛིན་དགེ་བཤེས་ནེ་གྷི་བློ་བཟང་བསྟན་འཛིན་ལགས་ཀྱིས་གནང་ཡོད་པ་དང་། འབྲས་སྤུངས་བློ་བསལ་གླིང་གི་དགེ་འདུན་པ་རྣམ་པས་རྡུལ་མཚོན་གྱི་དཀྱིལ་འཁོར་བཞེངས་རྒྱུ་སོགས་ཀྱི་མཛད་རིམ་ཡོད་པ་ཨེ་མོ་རི་དང་བོད་ཀྱི་ཚན་རིག་ལས་རིམ་གྱི་འབྲེལ་འཐུད་པ་ཀརྨ་བསྟན་འཛིན་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ངོ་སྤྲོད་གནང་བྱུང་།

ཚེས་ ༤ ཉིན་མང་ཚོགས་ལ་སྒོམ་ཁྲིད་ཀྱི་ལེ་ཚན་ཞིག་གོ་སྒྲིག་གནང་ཡོད་ཅིང་། ཕྱི་ལོ་ ༢༠༡༠ ལོར་གསར་འཛུགས་གནང་བའི་༧གོང་ས་༧སྐྱབས་མགོན་ཆེན་པོ་མཆོག་གི་མཚན་གནས་རྗེས་འབྲེལ་བསྟན་འཛིན་རྒྱ་མཚོའི་སློབ་ཡོན་ལས་འཆར་ཐོག་ནས་ཐོག་མར་སློབ་སྦྱོང་གནང་བར་ཕེབས་མཁན་གྱི་དགེ་བཤེས་གསུམ་ད་རེས་དུས་སྟོན་འདིའི་ཐོག་ཕེབས་ཡོད་པ་དང་། ཁོང་རྣམས་པས་ཞིབ་འཇུག་གནང་བའི་གྲུབ་དོན་ངོ་སྤྲོད་ཀྱིས་བགྲོ་གླེང་གནང་གི་ཡོད་པ་དེ་ནི་ད་ལོའི་དུས་སྟོན་ཐོག་དམིགས་བསལ་ཞིག་ཡིན་པ་ཀརྨ་བསྟན་འཛིན་ལགས་ཀྱིས་གསུངས་བྱུང་།
ཨེ་མོ་རི་གཙུག་ལག་སློབ་གྲྭར་ཕྱི་ལོ་ ༢༠༠༡ ལོ་ནས་ཨེ་མོ་རི་བོད་ཀྱི་བདུན་ཕྲག་ཅེས་པའི་དུས་སྟོན་འགོ་བཙུགས་པ་ནས་བཟུང་ད་བར་སློབ་གྲྭའི་སློབ་ཕྲུག་ཙམ་མ་ཟད། ས་གནས་ནང་བོད་ཀྱི་སྐོར་རྒྱུས་མངའ་རྩ་བ་ནས་མེད་པའི་མི་རིགས་དང་མང་ཚོགས་ཚོར་ཡང་བོད་ཀྱི་རིག་གནས་དང་ཆོས་ལུགས་སོགས་རྒྱུས་མངའ་ཡོང་རྒྱུར་ཕན་ཐོགས་ཆེན་པོ་བྱུང་ཡོད་པར་ངོས་འཛིན་ཞུ་གི་ཡོད་པ་རེད།
ཨེ་མོ་རི་གཙུག་ལག་སློབ་གྲྭའི་ནང་བོད་ཀྱི་བདུན་ཕྲག་ཅེས་པའི་ཉིན་གྲངས་ཁ་ཤས་རིང་སྤེལ་གྱི་ཡོད་པའི་བོད་ཀྱི་དུས་སྟོན་དེ་ད་ཆ་ཨེ་མོ་རི་གཙུག་ལག་སློབ་གཉེར་ཁང་གི་འཆར་ཅན་ལོ་ལྟར་སྤེལ་བའི་སྲོན་རྒྱུན་གྱི་ལས་འགུལ་ཞིག་ཏུ་འགྱུར་ཡོད་པ་རེད།།

* ཕྱི་ལོ་ ༢༠༢༣ ལོར་ཨ་རིའི་ཨེ་མོ་རི་གཙུག་ལག་སློབ་ཆེན་དུ་བོད་ཀྱི་བདུན་ཕྲག་ཅེས་པའི་དུས་སྟོན་སྲུང་བརྩི་ཞུས་པའི་པར།

གསར་འགོད་པ། འཆི་མེད། མཁའ་འགྲོ་གཡང་འཛོམས།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། བཀྲིས་དབང་ཕྱུག
དྲྭ་ཐོག་སྤེལ་མཁན། ཀླུ་འབུམ།