སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དངོས་བྱུང་མཛད་རྣམ་གློག་བརྙན་བདེ་སྐྱིད་ཀྱི་ཤེས་རབ་ཅེས་པའི་སྔོན་བརྡའི་བརྙན་ཐུང་ཁྱབ་བསྒྲགས་འགྲེམས་སྤེལ་གནང་འདུག

སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་ཨ་མི་རི་ཀའི་ཧོ་ལེ་ཝོ་ཌི་གློག་བརྙན་འཁྲབ་སྟོན་པ་གྲགས་ཅན་རི་ཆརཌི་གྷིཡར་ (Richard Gere)ལགས་(Netherlands)་རུ། ༠༩།༢༠༡༨

ཕྱི་ནང་གི་མི་རྣམས་ཀྱིས་ངང་སྒུག་ཞུ་བཞིན་པའི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དངོས་བྱུང་མཛད་རྣམ་༼བདེ་སྐྱིད་ཀྱི་ཤེས་རབ་༽ཅེས་པའི་གློག་བརྙན་གྱི་སྔོན་བརྡའི་དྲིལ་བསྒྲགས་གྱི་བརྙན་དེ་སུད་སིའི་ (Zurich) ཛུ་རིག་གློག་བརྙན་དུས་སྟོན་སྔོན་ལ་ཕྱི་ཟླ་ ༨ ཚེས་ ༢༩ ཉིན་འགྲེམས་སྤེལ་གནང་འདུག

སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དངོས་བྱུང་མཛད་རྣམ་གྱི་གློག་བརྙན་བདེ་སྐྱིད་ཀྱི་ཤེས་རབ་ (Wisdom of Happiness) ཅེས་པ་ནི་གློག་བརྙན་འཁྲབ་ཁྲིད་པ་སྦར་སྦ་ར་མིལཱར་(Barbara Miller) ལགས་དང་། ཧྥིལིཔ་ཌེལཱ་ཁུཝེསི་(Philip Delaquis) ལགས་རྣམ་གཉིས་ཀྱིས་འཁྲབ་ཁྲིད་གནང་བ་དང་། ཨ་མི་རི་ཀའི་ཧོ་ལེ་ཝོ་ཌི་གློག་བརྙན་འཁྲབ་སྟོན་པ་གྲགས་ཅན་རི་ཆརཌི་གྷིཡར་(Richard Gere) ལགས་དང་། འཁྲབ་གཞུང་རྩོམ་པ་པོ་ཨོརེན་མོཝར་མཎ་(Oren Moverman) རྣམ་གཉིས་ཀྱིས་བཟོ་བསྐྲུན་མཉམ་ལས་གནང་འདུག
གློག་བརྙན་དེའི་ནང་དགུང་གྲངས་ ༨༩ ཕེབས་པའི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་འགྲོ་བ་མི་རྣམས་ལ་ནང་སེམས་ཀྱི་ཞི་བདེ་དང་བདེ་སྐྱིད་སྐྲུན་ཐབས་སྐོར་བཀའ་སློབ་ལམ་སྟོན་སྩལ་གནང་པ་ཁག་མ་ཟད། ཞི་བདེ་བདེ་སྐྱིད་ལྡན་པའི་དུས་རབས་ ༢༡ པ་བསྐྲུན་པར་ནུས་ཤུགས་བཏོན་ཡོད་པ་གསལ་སྟོན་ཞུས་ཡོད་ཅིང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ངོ་ལོ་སྟོང་ཕྲག་ལྷག་སོང་བའི་རིན་ཐང་ཅན་གྱི་བོད་ཀྱི་ནང་ཆོས་ཀྱི་རིག་གཞུང་དང་། གོ་ལ་གཅིག་གྱུར་གྱི་སྤྱི་ཚོགས་དང་དེང་རབས་ཀུན་ཁྱབ་ཀྱི་ལྟ་གྲུབ་ཐད་ཀྱི་དགོངས་གཞི་གཏིང་ཟབ་ཁྱབ་སྤེལ་མཛད་པ་ཁག་ཀྱང་ངོ་སྤྲོད་ཞུས་ཡོད་པ་རེད།
༧གོང་ས་༧སྐྱབས་མགོན་ཆེན་པོ་མཆོག་གི་དངོས་བྱུང་མཛད་རྣམ་༼བདེ་སྐྱིད་ཀྱི་ཤེས་རབ་༽ཅེས་པ་དེ་མི་འགྱངས་པར་ཕྱི་ཟླ་ ༡༠ ཚེས་ ༣ ནས་ཚེས་ ༡༣ བར་ཛུ་རིག་ (Zurich) གློག་བརྙན་དུས་སྟོན་སྐབས་སུ་རྒྱ་ཁྱབ་ཀྱི་ཐོག་ནས་མང་ཚོགས་ལ་ཐོག་མར་གཟིགས་འབུལ་ཞུ་རྒྱུ་དང་། སྐབས་དེར་གློག་བརྙན་འཁྲབ་མཁན་རི་ཆརཌི་གྷིཡར་ (Richard Gere) ལགས་དང་། ཨོརེན་མོཝར་མཎ་ (Oren Moverman) ལགས། ༧གོང་ས་༧སྐྱབས་མགོན་ཆེན་པོ་མཆོག་གི་༧སྐུའི་གཅུང་མོ་བཀའ་ཟུར་རྗེ་བཙུན་པདྨ་མ་མཆོག་དང་བཀའ་ཟུར་བསྟན་པ་ཚེ་རིང་ལགས། ད་དུང་གློག་བརྙན་དེའི་འཁྲབ་ཁྲིད་པ་དང་པར་པ་བཅས་ཀྱིས་ཀྱང་མཉམ་ཞུགས་གནང་རྒྱུ་རེད་འདུག
དེ་ནས་༼བདེ་སྐྱིད་ཤེས་རབ་༽ཅེས་པའི་གློག་བརྙན་དེ་ཕྱི་ལོ་ ༢༠༢༤ ཕྱི་ཟླ་ ༡༢ ཚེས་ ༥ ནས་བཟུང་སུད་སིའི་གློག་བརྙན་ཁང་སོ་སོར་གཟིགས་འབུལ་གནང་རྒྱུ་དང་། ༧གོང་ས་༧སྐྱབས་མགོན་ཆེན་པོ་མཆོག་གི་དངོས་བྱུང་མཛད་རྣམ་གློག་བརྙན་༼བདེ་སྐྱིད་ཀྱི་ཤེས་རབ་༽ཅེས་པའི་ནང་དམིགས་བསལ་དང་ཞིབ་ཚགས་ཀྱི་ལམ་ནས་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚེའི་མཛད་རྗེས་དང་བྱམས་བརྩེའི་ཁྱད་ཡོན་དེ་དག་རྒྱ་ཆེའི་རྒྱལ་སྤྱིའི་མི་མང་གི་མིང་ལམ་དུ་གཟིགས་འབུལ་ཞུ་རྒྱུའི་སླད་བཀོད་ཡོད་ཅིང་། གློག་བརྙན་དེའི་ནང་ད་སྔ་ཕྱི་ལ་མ་བསྒྲགས་པའི་ཡིག་ཚགས་མང་པོ་ཞིག་ཀྱང་བཀོད་ཡོད་པས། འཛམ་གླིང་སྟེང་ཤུགས་རྐྱེན་ཆེན་པོ་ཐེབས་པར་ཡིད་ཆེས་བྱེད་བཞིན་ཡོད་པ་རེད།།

གསར་འགོད་པ། ལྕགས་མོ་འཚོ།
རྩོམ་སྒྲིག་པ། བསྟན་འཛིན་བདེ་སྐྱིད།
དྲྭ་ཐོག་རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་སྤེལ་མཁན། ཀླུ་འབུམ།