འདམ་རྡོ་ཆུ་རུད་ནས་ཐར་པའི་ལོ་རྒྱུས།
ཟླ་ ༨ ཚེས་ ༢༦ ཉིན་བལ་བོད་ས་མཚམས་སུ་བྱུང་བའི་འདམ་རྡོ་ཆུ་རུད་ཀྱི་གོད་ཆག་དེའི་ཁྲོད་ནས་ཚེས་ ༢༧ དང་ ༢༨ ཉིན་བལ་ཡུལ་གཞུང་ཕྱོགས་ཀྱི་ཉེན་སྐྱོབ་རུ་ཁག་གིས་ཐད་འཕུར་གནམ་གྲུ་བརྒྱུད་བོད་མི་ཁག་ཅིག་སྐྱབས་ཏེ་བལ་ཡུལ་རྒྱལ་ས་ཀཐ་མཎ་ཌུར་འབྱོར་འདུག་པའི་ཁོངས་ནས་གཅིག་གི་ཨ་མ་ལོ་ ༩༨ ཅན་ཞིག་གཡུག་སྟེ་བྲོས་དགོས་འཁེལ་འདུག
བལ་ཡུལ་ར་སུ་ལྦ་དགེ་རྒྱས་གླིང་གཞིས་ཆགས་ནས་ཡིན་པ་དོན་ཡོད་རྡོ་རྗེ་ལགས་ཀྱིས། གློ་བུར་ཆུ་རུད་བྱུང་བའི་སྐབས་དེར་གནམ་གྲུ་བྲག་ལ་བརྡབ་པ་ལྟ་བུའི་སྐད་སྒྲ་ཚོར་བ་བྱུང་ཞིང་། གཞུང་ཕྱོགས་ནས་ཆུ་རུད་ཡོང་གི་ཡོད་པའི་སྔོན་བརྡ་གང་ཡང་བྱུང་མི་འདུག་ལ། གློག་ཆད་པའི་རྐྱེན་གྱིས་ཁ་པར་སོགས་ཀྱི་འབྲེལ་མཐུད་ཡང་ཆ་ཚང་ཆད་ཡོད་པའི་གནས་སྟངས་འགྲེལ་བརྗོད་གནང་གི་འདུག་ལ། ཆུ་རུད་ཀྱིས་ཁོང་གི་འབྲེལ་ཡོད་ནང་མི་ཆ་ཚང་ཆུས་འཁྱེར་སོང་བས་ཚོར་བ་སྐྱོ་བོ་དང་ཡིད་མ་ཆེས་པ་བྱུང་འདུག ད་ཆ་ཁོང་ལ་ཡོད་པ་ནི་ལུས་པོ་གཅིག་པུ་ལས་ཁང་པ་དང་རྒྱུ་ནོར་ལོངས་སྤྱོད་གང་ཡང་མེད་ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།
ཆུ་རུད་འདི་གནམ་ནས་འཕྱུར་བ་ལྟ་བུ་མཐོང་འདུག
བལ་ཡུལ་ཕྱོགས་ཀྱི་སེར་ཐང་ཏི་མུ་རེ་ནས་ཡིན་པ་རང་ལོ་ ༦༧ བསྟན་འཛིན་ཉི་མ་ལགས་ཀྱིས། ཆུ་རུད་དེ་གནམ་ནས་འཕྱུར་བ་ལྟར་དུ་ཡོང་སྟེ་སྐབས་དེར་ས་འགུལ་ཡང་ཚོར་ཡོད་ཅིང་། ཆུ་རུད་ཡོང་བཞིན་པ་མཐོང་བ་དང་ཆུ་རུད་དེ་ཁོང་གི་ནང་ཁྱིམ་དུ་འབྱོར་བ་གཉིས་དུས་མཉམ་ཡིན་པ་འགྲེལ་བརྗོད་གནང་བ་དང་། སྐབས་དེར་ཁོང་དང་ཁོང་གི་ནང་མི། ཡུལ་མི་ ༩ བཅས་ཁོང་གི་བུ་ཆུང་བར་བུ་ཞིག་སྐྱེས་པའི་སྐྱེས་སྟོན་གཏོང་བཞིན་ཡོད་པའི་སྐབས་འདིར་དེར་འདུས་མི་ཆ་ཚང་མཉམ་དུ་བྲོས་ཏེ་ཐར་ཐུབ་པ་བྱུང་ཞེས་གསུང་གི་འདུགཨ་མ་རྒན་རྒོན་ཞིག་གཡུག་སྟེ་བྲོས་དགོས་བྱུང་པ། སེར་ཐང་ཏི་མུ་རེར་ཆུ་ལོག་བྱུང་སྐབས་བྲོས་པའི་སྐབས། རྒན་རྒོན་དང་བུ་ཕྲུག ལུས་པོའི་ནུས་སྟོབས་ཀྱི་ཆ་ནས་བྲོས་མ་ཐུབ་མཁན་མང་པོ་བྱུང་འདུགདེ་ཡང་སེར་ཐང་ཏི་མུ་རེ་ནས་ཡིན་པ་རང་ལོ་ ༥༨ ཉི་མ་ཕུན་ཚོགས་ལགས་ཀྱིས། ཆུ་གློག་མ་བྱུང་བའི་གོང་ཁོང་དང་བཟའ་ཟླ་གཉིས་ཁོང་གི་ཨ་མ་ལོ་ ༩༨ ཡིན་པ་དང་མཉམ་བསྡད་ཡོད་ཀྱང་། ཆུ་རུད་བྱུང་སྐབས་ཨ་མ་སྒུག་ན་རང་སྲོག་ཤོར་བར་བསམ་སྟེ། ཨ་མ་རྒྱབ་ཏུ་གཡུག་བཞག་སྟེ་ཨ་མ་མིག་གི་མཐོང་གིན་ཆུས་འཁྱེར་ཕྱིན་པའི་གནས་སྟངས་བྱུང་པ་དང་། ཁོང་གི་བཟའ་ཟླ་ནི་ཆུ་རུད་ཀྱི་བར་ན་ཐར་ཐུབ་ཙམ་བྱུང་ཡོད་པ་གསུངས་བྱུང་།
སྐར་མ་གཉིས་ནང་གྲོང་གཞིས་ཡོངས་སུ་ཆུས་འཁྱེར་བ།
ཉི་མ་ཕུན་ཚོགས་ལགས་ཀྱིས་མུ་མཐུད་གསུངས་དོན་དུ། ཆུ་རུད་མ་བྱུང་གོང་ཁྱིམ་ཚང་ཆ་ཚང་གི་གློག་ཆད་པ་དང་། དེ་ནས་གློ་བུར་དིང་སྒྲ་བསྒྲགས་ཞིང་། གྲོང་པ་ཆ་ཚང་མིའི་སྐད་གཅོར་གྱིས་འཁེངས་ཏེ། སྐར་མ་གཉིས་ནང་གྲོང་པ་ཚང་མ་ཆུས་བསྣུབས་སོང་ཞེས་དང་། ཆུ་རུད་དེ་བྱུང་སྐབས་ཁོང་ལ་དངངས་སྐྲག་ཞེ་དྲགས་བྱུང་སྟེ་རྐང་བརྗེ་མ་བྲོས་ཕྱིན་ཡིན་ཞེས་གསུངས་བྱུང་།
དེ་སྔ་ཁུལ་དེར་ཆུ་རུད་ཚབས་ཆེ་དེ་འདྲ་བྱུང་མེད་སྟབས་ཚང་མས་སྣང་མེད་དུ་ཤོར་ཡོད་ཀྱང་། ཆུ་རུད་དེ་ནི་ཁང་བརྩེགས་ཧ་ཅང་མཐོ་བའི་ཁང་པའི་མཐོ་ཚད་དང་མཉམ་ཞིང་། ཆུ་གནམ་ལ་ཡོད་པ་ལྟར་དུ་སྣང་བས། དེའི་བར་ན་ཁང་པ་མཐོང་ཐུབ་ཐབས་བྲལ་བར་གྱུར་ཡོད་པ་གསུངས་བྱུང་།
རི་མགོར་ཡོད་མཁན་ཚོ་ཐར་འདུག
ས་གནས་ནས་བྲོས་ཐར་མཁན་མང་པོ་ཞིག་དོན་རྐྱེན་བྱུང་ཡུལ་དུ་མེད་པའམ་རི་མགོར་འགྲོ་བ། ཡང་ན་ཕྱི་ལ་ཐོན་ནས་བྲོས་རྒྱུའི་དུས་ཚོད་ཕྲན་བུ་ཐོབ་པ་ཤ་སྟག་རེད་འདུག་ལ། ཁོང་ཚོ་འདམ་རྡོ་ཆུ་རུད་འདི་དམག་སར་སླེབས་པ་སྟེ་མེ་མདའ་དང་འབར་རྫས་གས་པ་ལྟ་བུའི་སྒྲ་ཐོས་པ་དང་མྱོང་ཚོར་བྱུང་འདུག
དེ་ཡང་གསེར་ཐང་ཏི་མུ་རེ་ནས་ཡིན་པ་བསོད་ནམས་དབང་འདུས་ལགས་ཀྱིས། ཆུ་རུད་འབྱུང་བའི་སྐབས་སུ་ཁོང་ཞིང་ཁར་ཚལ་བཏབ་ཆེད་ཏོག་རྩེ་ལེན་པར་འགྲོ་བཞིན་ཡོད་པ་དང་། སྐབས་དེར་ནམ་མཁར་དར་ལྕོག་དཀར་པོ་ལྟ་བུ་ཞིག་རྒྱ་ཆེན་པོ་ཞིག་འཕྱུར་བའམ་གནམ་གྲུ་ལྟ་བུ་བསྐོར་བ་རྒྱབ་པ་ལྦིང་ལྦིང་ཞེས་སྐད་སྒྲ་སྒྲོག་གིན་ཡོང་བ་ཞིག་དང་། དེའི་བརྒྱབ་ན་ཆུ་རུད་དེ་ནག་པོ་འདྲ་པོ་ཞིག་ཡོང་བཞིན་མེ་མདའ་རྒྱག་པ་ལྟར་དུ་གཤམ་གྱི་གྲོང་པ་ཆ་ཚང་ནག་ཐིམ་མེར་བཟོས་ཏེ། སྐར་མ་གཅིག་གཉིས་ཙམ་ནང་ཆ་ཚང་སྟོང་སེང་ངེ་བཟོས་ཏེ་ཐག་ཆོད་ཡོད་པ་འགྲེལ་བརྗོད་གནང་བྱུང་ལ། ཆུ་རུད་དེས་ཁང་གི་སྤུན་ཉེ་བཅོ་ལྔ་ཉི་ཤུ་ཙམ་ཆུས་འཁྱེར་ཕྱིན་ཡོད་ཀྱང་། ཁོང་གིས་སྐྱེ་དམན་གང་དུ་ཡོད་ན་བསམ་བཞིན་སྤྱན་རས་གཟིགས་སྒོམ་བཞིན་གསོལ་བ་སྙིང་དབུས་ནས་བཏབ་སྐབས། ཆུ་ཚོད་གཅིག་གི་ནང་སྐྱེ་དམན་ཡང་ངུ་སྒྲ་སྒྲོག་བཞིན་ཁོང་འཚོལ་དུ་ཡོང་བཞིན་པ་མཐོང་བས་སེམས་པ་ལྷོད་ལ་བབ་ཡོད་པའི་གནས་སྟངས་ཤིག་འགྲེལ་བརྗོད་གནང་བྱུང་།
བོད་དང་བལ་ཡུལ་ས་མཚམས་སུ་འབྲེལ་ཐག་ཆད་པ།
ས་གནས་སུ་ད་ཆ་དཀའ་ངལ་ཆེ་ཤོས་ནི་བགྲོད་ལམ་ཆད་པ་དང་། གློག་ཆད་ནས་བོད་དང་བལ་ཡུལ་གཉིས་ཀའི་ནང་ཁ་པར་གྱི་འབྲེལ་མཐུད་ཆད་དེ་ད་ལྟ་ཡིན་ཡང་ང་ཚོར་གནས་ཚུལ་བརྗོད་མཁན་མང་པོས་ས་གནས་སུ་འབྲེལ་བ་མཐུད་ཐུབ་ཀྱི་མེད་པ་བརྗོད་བྱུང་།
ད་ལྟའི་ཆར་ཉེན་སྐྱོབ་ཟིན་པ་ཁག་གཅིག་བལ་ཡུལ་ཀཌ་མན་ཌུ་ཁུལ་གྱི་དགོན་པ་ཁག་དང་། ཁག་གཅིག་གཞུང་གིས་གྲ་སྒྲིག་བྱས་པའི་སྡོད་སྒར་ནང་བཞུགས་ཀྱི་ཡོད་པའི་གནས་ཚུལ་གོ་རྒྱུ་འདུག
ངལ་སེལ་དྭང་བླངས་རོགས་སྐྱོར།
བལ་བོད་ས་མཚམས་སུ་བྱུང་བའི་འདམ་རུད་ཀྱི་གོད་ཆག་འོག་རྐྱེན་འདས་སུ་ཕྱིན་པ་རྣམས་ཀྱི་ཤུལ་ལུས་བུ་ཕྲུག་ཚོར་རོགས་སྐྱོར་ཆེད། ཨ་རི་ལྦ་ཤིང་ཊོན་དུ་གནས་སྡོད་བོད་རིགས་གཞོན་སྐྱེས་མིང་བརྗོད་འདོད་མེད་པ་ཞིག་གིས་སྣེ་ཁྲིད་དེ་ཁག་ཅིག་གིས་ཆུ་ཚོད་ ༤༨ རིང་གི་དཔལ་འབྱོར་འདུ་འགོད་འགོ་འཛུགས་བྱས་འདུག
དེ་ཡང་ཨ་རིའི་རྒྱལ་ས་ལྦ་ཤིན་ཊོན་དུ་གནས་བཞུགས་བོད་མི་དེས་ཆུ་རུད་ཀྱི་གནས་ཚུལ་ཐོས་མ་ཐག་ཏི་མུ་རེ་ཁུལ་དུ་བོད་ཁྱིམ་སློབ་གྲོགས་ལ་འབྲེལ་བ་བྱས་པར། སློབ་གྲོགས་དེ་སྐར་མ་གཉིས་ཙམ་འགོར་ན་ཆུས་འཁྱེར་ཟིན་ཡོད་ཀྱང་དུས་ཐོག་བྲོས་ཐར་ཐུབ་ཙམ་བྱུང་སྟེ། མི་ ༣༠༠ ལྷག་དང་མཉམ་བལ་ཡུལ་རྒྱལ་ས་ཀཐ་མན་གྲུའི་ཡ་ལོ་དགོན་པར་བསྡད་ཡོད་པས། ཁོང་གི་ལུང་པར་གལ་ཏེ་དེ་སྔ་མི་བརྒྱ་ཡོད་ན་ད་ཆ་སུམ་བཅུ་མ་གཏོགས་ལྷག་མེད་ཅིང་ཁང་པ་སོགས་ཀྱི་ཤུལ་ཙམ་ཡང་ལྷག་མེད་པ་འགྲེལ་བརྗོད་གནང་འདུག
ཀཐ་མན་གྲུའི་དགོན་པ་དེར་མྱུར་སྐྱོབས་ངལ་སེལ་གྱི་སླེབས་པའི་ཕྲུ་གུ་ཆུང་ཆུང་མང་པོ་ཞིག་ནང་མི་སྤུན་མཆེད་གང་ཡང་མེད་པར་ལུས་ཡོད་པས། བོད་མི་དེ་དག་གིས་ཆུ་ཚོད་ ༤༨ རིང་ཉེ་འཁོར་གྲོགས་པོ་གྲོགས་མོའི་བརྒྱུད་ཞལ་འདེབས་འཚོལ་སྒྲུབ་བྱེད་བཞིན་ཡོད་པ་གསུངས་བྱུང་།།
བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།