ཁྲེང་ཀོང་ཁྲེང་གིས་ཨ་རིའི་གཞུང་ཚབ་ཁང་དུ་སྐྱབས་བཅོལ་།

༄༅༎རྒྱ་ནག་གི་འགྲོ་བ་མིའི་ཐོབ་ཐང་དོན་གཉེར་བ་དང་ཁྲིམས་རྩོད་པ་ཁྲེན་ཀོང་ཁྲེང་ ཨ་མི་རི་ཀའི་སྲུང་སྐྱོབ་འོག་ཉར་བ་དེས་རྒྱ་ནག་ངོ་ཚ་པོ་ཆགས་པ་མ་ཟད་ ཡུལ་གྲུ་གཉིས་ཀྱི་འབྲེལ་བར་ཡང་གནོད་སྐྱོན་བཟོ་སྲིད་པ་ཞིག་ཡིན་པ་རེད། ད་ལྟའི་ཆར་ཨ་མི་རི་ཀ་དང་ རྒྱ་ནག་གཉིས་ཀས་ལོ་ན་༤༠སོན་པའི་ ཁྲེན་ཀོང་ཁྲེང་གང་དུ་ཡོད་མེད་སྐོར་གསུང་གི་མེད་པ་རེད་། ཉིན་གྲངས་བརྒྱད་ཙམ་གོང་ རྒྱ་ནག་གཞུང་དང་ཆབ་སྲིད་ཀྱི་བལྟ་བ་མི་མཐུན་པ་ ཁྲེན་ཀོང་ཁྲེང་ཁོང་བཟང་བཙོན་ནས་བྲོས་བྱོལ་དུ་ཕྱིན་ཏེ་ ཨ་རིའི་གཞུང་ཚབ་ཁང་དུ་སྐྱབས་བཅོལ་དུ་གནས་ཡོད་པ་རེད། ཁྲེན་ཀོང་ཁྲེང་ཁོང་གི་གནད་དོན་དེ་ནི་ཨ་རི་དང་རྒྱ་ནག་དབར་ཧ་ཅང་ཚོར་བ་ཆེ་བའི་གནད་དོན་ཞིག་ཏུ་གྱུར་ཡོད་པ་རེད། 
ཁྲེན་ཀོང་ཁྲེང་གི་གྲོགས་པོ་ཞིག་གིས་ ཁོང་ད་ལྟ་ཨ་རིའི་གཞུང་ཚབ་ཁང་དུ་ཡོད་ཀྱང་ ཁོང་གིས་ཨ་རིའི་གཞུང་ལ་སྐྱབས་བཅོལ་ཞུ་རྩིས་མེད་ལུགས་གསུང་བཞག། གལ་སྲིད་ཁོང་གིས་ ཨ་རིར་སྐྱབས་བཅོལ་མ་ཞུས་ཚེ་ ཁོང་པེ་ཅིང་དུ་ཡོད་པའི་ཨ་རིའི་གཞུང་ཚབ་ཁང་དུ་གནས་སྐབས་རིང་སྡོད་དགོས་ཆགས་སྲིད་པ་རེད།
ཨ་མི་རི་ཀའི་ཕྱི་སྲིད་དྲུང་ཆེ་ཧི་ལ་རི་ཀི་ལིན་ཀྲེན་མཆོག་རེས་གཟའ་ལྷག་པ་ཉིན་རྒྱ་ནག་ཏུ་རྒྱ་ནག་གི་དབུ་ཁྲིད་རྣམས་དང་ལྷན་དུ་གྲོས་མོལ་གནང་ཆེད་ཕེབས་གཏན་འཁེལ་ཡོད་པ་དང་ ལྕམ་ཀི་ལིན་ཀྲེན་མཆོག་གིས་རྒྱ་ནག་གཞུང་གིས་ཁྲེན་ཀོང་ཁྲེང་སོགས་མང་གཙོའི་ལས་འགུལ་བར་གདུག་རྩུབ་བྱེད་བཞིན་པ་དེར་ ཡང་ནས་ཡང་དུ་སྐྱོན་བརྗོད་ཞུས་ཏེ་ ཁོང་བཙོན་ཁང་ནས་གློད་འགྲོལ་གཏོང་དགོས་པའི་དགོས་འདུན་བཏོན་ཡོད་པ་རེད།
ཨ་རིའི་ཕྱི་སྲིད་དྲུང་ཆེ་ཧི་ལ་རི་ཀི་ལིན་ཀྲེན་མཆོག་རྒྱ་ནག་ཏུ་མ་ཕེབས་པའི་ཉིན་ཤས་གོང་གནས་ཚུལ་དེ་བྱུང་བ་དེ་ནི་ དུས་ཚོད་ཀྱི་ཆ་ནས་དུས་ཚོད་སྡུག་པོ་ཞིག་འཁེལ་ཡོད་ལུགས་ ཧོང་ཀོང་གི་གཙུག་ལག་སློབ་གྲ་ཆེན་མོའི་རྒྱ་ནག་མཁས་པ་ཇོན་པིཡེར་ཁ་སྦེསི་ཀྲེན་ཞུ་བས་གསུང་བཞག།