སྡེ་དགེའི་སྐམ་ཐོག་གློག་ཁང་གསར་རྒྱག་གི་གནས་སྟངས་ཐད་རྒྱལ་སྤྱིའི་བོད་དོན་ལས་འགུལ་ཁང་གིས་སེམས་ཚབས་ཡོད་པ་བསྟན་འདུག

2024.05.10
སྡེ་དགེའི་སྐམ་ཐོག་གློག་ཁང་གསར་རྒྱག་གི་གནས་སྟངས་ཐད་རྒྱལ་སྤྱིའི་བོད་དོན་ལས་འགུལ་ཁང་གིས་སེམས་ཚབས་ཡོད་པ་བསྟན་འདུག རྒྱ་ནག་གི་ཉེན་རྟོག་པས་ཁམས་སྡེ་དགེ་རྫོང་ཁོངས་དབོན་སྟོད་ཁུལ་དུ་བོད་མི་ཚོ་འཛིན་བཟུང་སྐབས། ༠༢།༢༢།༢༠༢༤
བོད་འབྱོར། མི་སེར་གསར་འགོད་པ།

འཇར་མན་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་པ་དང་ཞུ་གཏུག་འགན་འཛིན་བསྟན་འཛིན་དཔལ་མོ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ། ཁོང་གིས་རྒྱ་ནག་གཞུང་གིས་བོད་ཀྱི་ཁམས་སྡེ་དགེ་ཁུལ་དུ་ཆུ་ཤུགས་གློག་འདོན་ས་ཚིགས་གསར་རྒྱག་གི་ལས་གཞིའི་ཐད་ཉམས་ཞིབ་བྱས་སྐབས་སྡེ་དགེ་སྐམ་ཐོག་ཁུལ་གྱི་ཆུ་ཤུགས་གློག་འདོན་ས་ཚིགས་དེ་གཅིག་པུ་མིན་པར་རྒྱ་ནག་གཞུང་གིས་བོད་ནང་གི་གཙང་ཆུ་འདྲ་མིན་ཐོག་ཆུ་ཤུགས་གློག་འདོན་ས་ཚིགས་གསར་པ་༡༥༠ཙམ་རྒྱག་རྒྱུའི་འཆར་གཞི་ཡོད་པ་ཤེས་རྟོགས་བྱུང་བ་ཙམ་དུ་མ་ཟད། ཆུ་མཛོད་གློག་ཁང་གསར་པ་རྒྱག་རྒྱུའི་ལས་འཆར་དེའི་འོག་བོད་མི་འབུམ་གཅིག་ལྷག་ཙམ་བཙན་དབང་གིས་གནས་སྤོ་བྱེད་འཇུག་རྒྱུའི་འཆར་གཞི་ཡོད་པ་དང་། ཆུ་ཤུགས་གློག་འདོན་ས་ཚིགས་ཁག་གི་གློག་ཤུགས་དེ་རྒྱ་ནག་གི་ཞིང་ཆེན་ཁག་ཏུ་ཁྲིད་རྒྱུའི་ཆེད་དུ་ཡིན་པ་ལས་ས་གནས་བོད་མི་རྣམས་ལ་ཕན་ཐོགས་མེད་པ་དེ་ཤེས་རྟོགས་བྱུང་པ་ལ་བརྟེན་ནས། གནས་ཚུལ་དེ་རྒྱལ་སྤྱིའི་སྤྱི་ཚོགས་དང་མི་མང་ལ་གསལ་སྟོན་བྱེད་དགོས་པ་དེ་གལ་ཆེན་པོ་རེད་བསམ་པ་མཐོང་ནས་ད་རེས་ཀྱི་སྡེ་དགེ་དང་འབྲེལ་བའི་སྙན་ཐོ་དེ་བཏོན་ཡིན་པ་གསུངས་བྱུང་།
འཇར་མན་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ཉེ་ཆར་སྤྱི་ཟླ་༤པའི་ཚེས་༣༠ཉིན་ཉམས་ཞིབ་ཀྱི་དཔྱད་རྩོམ་ཞིག་སྤེལ་བའི་ནང་། ཟླ་བ་གཉིས་ཙམ་གྱི་གོང་སྟེ་སྤྱི་ཟླ་གཉིས་པའི་ཚེས་༡༤ཉིན། བོད་ཀྱི་ཁམས་སྡེ་དགེ་ཁུལ་གྱི་བོད་མི་བརྒྱ་ལྷག་ཙམ་ཞིག་སྡེ་དགེ་རྫོང་གི་ས་གནས་རྒྱ་ནག་གི་ལས་ཁུངས་མདུན་དུ་འདུ་འཛོམས་ཀྱིས་ཞི་བའི་ཐོག་ནས་སྡེ་དགེ་སྐམ་ཐོག་ཏུ་རྒྱ་ནག་གཞུང་གིས་སྐམ་ཐོག་གློག་ཤུགས་གློག་འདོན་ས་ཚིགས་གསར་རྒྱག་གི་ལས་གཞིར་ས་གནས་བོད་མི་ཚོས་མོས་མཐུན་མེད་པ་དང་། ཆུ་ཤུགས་གློག་འདོན་ས་ཚིགས་གསར་བསྐྲུན་བྱས་པའི་རྐྱེན་པས་ས་གནས་ཀྱི་གྲོང་པ་གཉིས་ཀྱི་མི་མང་དང་དགོན་པ་དྲུག་ཙམ་གནས་སྤོ་བྱེད་དགོས་པ་དང་། ཆུ་མཛོད་དེའི་རྐྱེན་པས་གཤམ་འོག་དགོན་གྲོང་ཁག་ཅིག་ཆུའི་འོག་ཏུ་ཐིམ་རྒྱུ་ཡིན་པ་བཅས་ཀྱི་ཐད་མི་མང་གིས་སེམས་ཚབས་དང་བཅས་ཞུ་འབོད་བྱས་སྐབས། རྒྱ་ནག་གི་ཉེན་རྟོག་པས་བོད་མི་ཆིག་སྟོང་ཙམ་དོ་དམ་བྱས་པ་དང་ཛ་དྲག་གི་གནས་སྟངས་ཆགས་ཡོད་པ་སོགས་ཀྱི་གནས་ཚུལ་སྤེལ་ནས། རྒྱལ་སྤྱིའི་བོད་དོན་ལས་འགུལ་ཁང་གི་ངོས་ནས་སྡེ་དགེ་ས་གནས་ཀྱི་གནས་སྟངས་ལ་མུ་མཐུད་དུ་སེམས་ཚབས་བྱེད་བཞིན་ཡོད་པ་དང་། སྐམ་ཐོག་ཆུ་ཤུགས་གློག་ཁང་གི་ལས་གཞི་དེའི་གནས་སྟངས་གང་འདྲ་ཆགས་མིན་གྱི་གནས་ཚུལ་གསལ་པོ་ཤེས་རྟོགས་མེད་པས། རྒྱ་ནག་གཞུང་གིས་བོད་ནང་དེ་ལྟ་བུའི་ཆུ་མཛོད་གློག་ཁང་གསར་རྒྱག་གི་ལས་གཞི་གཞན་མང་དག་ཅིག་མུ་མཐུད་སྤེལ་དང་སྤེལ་མུས་ཡིན་པའི་ཐད་ཕྱི་གསལ་ནང་གསལ་བྱ་དགོས་པའི་འབོད་སྐུལ་ཞུས་འདུག
ཡང་སྙན་ཐོའི་ནང་བོད་ཀྱི་ཁམས་སྡེ་དགེ་རུ་སྐམ་ཐོག་གློག་འདོན་ས་ཚིགས་འཛུགས་སྐྲུན་བྱེད་རྒྱུའི་ལས་གཞི་དེའི་ཐོག་ནས་རྒྱ་ནག་གཞུང་གིས་བོད་ནང་གི་གཙང་ཆུའི་ཐོག་ཆུ་ཤུགས་གློག་འདོན་ས་ཚིགས་བཟོ་བསྐྲུན་གྱིས་རྒྱ་ནག་ནང་གློག་འདྲེན་རྒྱུ་ཡིན་པ་གསལ་སྟོན་བྱས་འདུག
བོད་ཀྱི་ཁམས་སྡེ་དགེའི་འབྲི་ཆུ་གཙང་པོའི་བརྒྱུད་ཀྱི་སྐམ་ཐོག་ཏུ་ཆུ་ཤུགས་གློག་འདོན་ས་ཚིགས་རྒྱག་རྒྱུའི་ས་ཁུལ་དེ་དག་ནི། ད་ལྟ་རྒྱ་ནག་གིས་འབོད་བཞིན་པའི་བོད་རང་སྐྱོང་ལྗོངས་ཀྱི་ཆབ་མདོ་ས་ཁུལ་གྱི་འཇོ་མདའ་རྫོང་དང་། དཀར་མཛེས་བོད་རིགས་རང་སྐྱོང་ཁུལ་ཟེར་བ་དང་། དེ་བཞིན་ཤར་ཕྱོགས་སུ་ཟི་ཁྲོན་ཞིང་ཆེན་གྱི་ཁོངས་བཅས་ཚུད་ཀྱི་ཡོད་པ་དང་། བོད་ནང་རྒྱ་ནག་གཞུང་གིས་གློག་ཤུགས་(gigawatt)་འབུམ་གཅིག་ལྷག་འདོན་ཐུབ་པའི་ཆུ་ཤུགས་གློག་འདོན་ས་ཚིགས་རྒྱག་རྒྱུའི་ལས་གཞི་དེ་ཐོག་མ་སྤྱི་ལོ་༢༠༡༢ལོ་རྒྱ་ནག་རྒྱལ་ཡོངས་འཛུགས་སྐྲུན་དང་བཅོས་བསྒྱུར་ལྷན་ཚོགས་ཀྱིས་ཆོག་མཆན་སྤྲད་ཡོད་པ་རེད། ཡིན་ན་ཡང་ལས་འཆར་དེའི་རྐྱེན་པས་ས་གནས་ཀྱི་བོད་མིའི་དགོན་སྡེ་དྲུག་དང་གྲོང་ཚོ་གཉིས་ཆུའི་འོག་འཐིམ་ཉེན་ཡོད་པས། དགོན་གྲོང་གཉིས་དང་ས་གནས་མི་མང་རྣམས་རྒྱ་ནག་གཞུང་གིས་བཙན་དབང་གིས་གནས་སྤོ་བྱེད་དུ་བཅུག་པའི་འཆར་གཞི་ཡོད་པས། བོད་ཀྱི་རྒྱལ་རབས་ལོ་རྒྱུས་ལྡན་པ་དང་བོད་ཀྱི་རིག་གཞུང་གི་ལྟེ་གནས་དང་བོད་མིའི་སྤྱི་ཚོགས་དེ་དག་མེད་པ་ཆགས་ཉེན་ཡོད་པ་དེ་ནི་ཡ་ང་བའི་གནས་ཚུལ་ཞིག་ཡིན་པ་གསལ་སྟོན་གནང་འདུག
རྒྱ་ནག་གཞུང་གིས་བོད་ཀྱི་ས་ཁུལ་ཁག་ཏུ་ཆུ་ཤུགས་གློག་ཁང་དང་ཆུ་རག་གསར་རྒྱག་གི་ལས་གཞི་དེ་དག་ཡོངས་ཁྱབ་དུ་མི་འགྲོ་བའི་ཆེད་དུ་ཐབས་ཤེས་འབད་བརྩོན་བྱེད་བཞིན་པ་ཡིན་ན་ཡང་། ད་རེས་བོད་ཀྱི་ཁམས་སྡེ་དགེ་ཁུལ་གྱི་འབྲི་ཆུའི་རྒྱུད་དུ་རྒྱ་ནག་གཞུང་གིས་སྐམ་ཐོག་གློག་ཁང་རྒྱག་རྒྱུའི་ལས་གཞི་དེས་རྒྱ་ནག་གཞུང་གིས་བོད་ནང་གི་གཙང་ཆུ་ཁག་གི་ཐོག་ཆུ་རག་རྒྱག་རྒྱུའི་ལས་གཞི་གཞན་དག་རིམ་བཞིན་ལག་བསྟར་བྱེད་རྒྱུའི་ཉེན་བརྡ་བཏང་བ་ལྟ་བུ་ཞིག་ཡིན་པ་བཀོད་འདུག

ཨེ་ཤེ་ཡ་རང་དབང་རླུང་འཕྲིན་ཁང་ལ་ཕྱི་ཟླ་༣ ཚེས་༢༥ཉིན་བོད་ནས་རང་ཉིད་ཀྱི་བདེ་འཇགས་ཆེད་མིང་གསལ་འདོན་མ་བྱས་པའི་བོད་མི་ཁག་ཅིག་གིས། དབོན་སྟོད་དགོན་པའི་ཕྱག་མཛོད་བགྲེས་པ་བསྟན་འཛིན་བཟང་པོ་ལགས་དང་གྲོང་ཚོའི་ལས་བྱེད་པ་བསྟན་འཛིན་ལགས་གཉིས་མུ་མཐུད་དུ་འཛིན་བཟུང་བཀག་ཉར་འོག་ཡོད་པ་མ་ཟད། ཕྱི་ཟླ་༣ཚེས་༢༤ཉིན་ཁོང་གཉིས་ཀྱི་གྱོད་གཞི་གཞུང་ཕྱོགས་ཀྱི་གྱོད་དོན་ཞིབ་དཔྱོད་ཁང་ལ་རྩིས་སྤྲོད་བྱས་ཡོད་པ་གནས་ཚུལ་ངོ་སྤྲོད་གནང་བྱུང་།

* སྡེ་དགེ་དང་འབྲེལ་བའི་དེའི་སྔོན་གྱི་གནས་ཚུལ་ཁག ཟླ་གཉིས་བའི་ཚེས་༡༤ ཚེས་༢༠ ཚེས་༢༢ ཚེས་༢༤ ཚེས་༢༥ ཚེས་༢༧ ཟླ་གསུམ་པའི་ཚེས་༠༦



གསར་འགོད་པ། ཚེ་དབང་ནོར་བུ།
རྩོམ་སྒྲིག་པ། དོན་གྲུབ་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།

བལྟ་བཤེར་མང་ཤོས་བྱས་པའི་གནས་ཚུལ།
RFA
རྒྱ་ནག་གཞུང་གིས་བསྐོ་བཞག་བྱས་པའི་པཎ་ཆེན་རྒྱལ་མཚན་ནོར་བུ་ཡོང་སྐབས་དྲག་ཆས་དམག་གིས་སོ་ལྟ་དང་ཞིབ་བཤེར་དམ་དྲག་ཤུགས་ཆེར་བྱས་ཡོད་འདུག
བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
བོད་ཀྱི་བླ་ན་མེད་པའི་དབུ་ཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཨ་རིར་ཆིབས་སྒྱུར་གནང་པའི་ཕེབས་ལམ་དུ་༧སྐུ་ངལ་གསོ་ཆེད་སུད་སི་གྲོང་ཁྱེར་ཛུ་རིག་ཏུ་ཞབས་སོར་བདེ་བར་འཁོད་ཡོད།
མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎