ཨ་རི་དང་རྒྱ་ནག་བར་ཐེ་དབན་ཐད་གྲོས་བསྡུར་གནང་ཡོད་པ།

༄༅༎ཨ་མི་རི་ཀའི་ངོས་ནས་ཐེ་དབན་ལ་མཁའ་དམག་གནམ་གྲུ་ཚོང་བསྒྱུར་བྱ་རྒྱུའི་ཐག་གཅོད་བྱེད་ལ་ཉེ་བ་ཡོད་པའི་གནས་ཚུལ་ཞིག་ཐོན་བཞིན་ཡོད་པ་དང་། ཐེ་དབན་ལ་གོ་མཚོན་ཚོང་བསྒྱུར་བྱ་རྒྱུ་དེས། ཨ་མི་རི་ཀ་དང་རྒྱ་ནག་གི་འབྲེལ་ལམ་ལ་དོ་ཕོག་མི་ཡོང་བའི་སྔོན་འགོག་གི་ཆེད་གཟའ་པ་སངས་ཉིན་ཨ་མི་རི་ཀ་དང་རྒྱ་ནག་གི་ཆེས་མཐོའི་དཔོན་རིགས་དབར་གནད་དོན་འདིའི་ཐད་བཀའ་བསྡུར་གནང་ཡོད་འདུག

ཐེ་དབན་གྱིས་རྒྱུན་རིང་ཨ་མི་རི་ཀར་ F-16 རྟགས་ཅན་གྱི་ཨ་མི་རི་ཀའི་མཁའ་དམག་གནམ་གྲུ་ཚོང་བསྒྱུར་ཡོང་བའི་རེ་འདུན་བཏོན་པ་ལྟར། དེ་ལྟར་ཚོང་བསྒྱུར་བྱེད་མིན་ གྱི་ཐག་གཅོད་ཅིག་འདི་ལོ་ཕྱི་ཟླ་བཅུ་པའི་ཚེས་ ༡ གོང་བྱ་རྒྱུ་ཡིན་པ་ཨ་མི་རི་ཀའི་གཞུང་གི་དཔོན་རིགས་ཚོས་བརྗོད་བཞིན་ཡོད་པ་རེད།

རྒྱ་ནག་གི་ཐེ་དབན་ལས་དོན་ཐད་ཀྱི་འགན་འཛིན་ ཝང་ ཡི་དང་། ཨ་མི་རི་ཀའི་ཕྱི་སྲིད་དྲུང་ཆེ་གཞོན་པ་ Williams Burns རྣམ་གཉིས་ཨ་མི་རི་ཀའི་ཕྱི་སྲིད་ལས་ཁུངས་སུ་མཇལ་འཕྲད་གནང་ཞིང་། ཨ་རིའི་ཕྱི་སྲིད་དྲུང་ཆེ་ ཧི་ལ་རི་ ཀིལན་ཊན་ཡང་དེའི་ནང་མཉམ་ཞུགས་གནང་ཡོད་འདུག།

རྒྱ་ནག་གཞུང་འབྲེལ་ཤིན་ཧྭ་གསར་ལས་ཁང་གིས། རྒྱ་ནག་སྐམ་ས་ཆེན་པོའི་ངོས་ནས་ ཨ་མི་རི་ཀས་ཐེ་དབན་ལ་གོ་མཚོན་ཚོང་བསྒྱུར་བྱ་རྒྱུར་མཐའ་གཅིག་ཏུ་ངོ་རྒོལ་བྱེད་བཞིན་ཡོད་པར་མ་ཟད། གནད་དོན་དེས་རྒྱ་ནག་དང་ཨ་མི་རི་ཀའི་འབྲེལ་ལམ་ལ་དོ་ཕོག་གཏང་རྒྱུ་དང་། དེ་བཞིན་མཚོ་སྒག་ཕན་ཚུན་གྱི་འབྲེལ་ལམ་ལ་ཡང་དོ་ཕོགས་གཏང་རྒྱུ་ཡིན་པ་བརྗོད་ཡོད་པ་རེད།

ཨ་མི་རི་ཀའི་ཕྱི་སྲིད་ལས་ཁུངས་ཀྱི་ངོས་ནས་གྲོས་མོལ་གྱི་ཞིབ་ཕྲའི་གནས་ཚུལ་ཁྱབ་སྤེལ་བྱས་མེད་ན་ཡང་། གསལ་བསྒྲགས་ཤིག་སྤེལ་བ་དེའི་ནང་ཨ་མི་རི་ཀ་དང་རྒྱ་ནག་དབར་གནད་དོན་གལ་ཆེ་མང་དག་ཅིག་གི་ཐོག་གྲོས་མོལ་བྱེད་དགོས་པ་ནི་ཧ་ཅང་གི་གནད་འགག་ཆེན་པོ་ཡིན་ཡང་ གྲོས་མོལ་གྱི་ལས་དོན་དེ་དག་གིས། ཨ་མི་རི་ཀ་དང་ཐེ་དབན་དབར་འབྲེལ་ལམ་དམ་གཟབ་ཡོད་པ་དེར་གནོད་སྐྱོན་འགྲོ་དགོས་དོན་གང་ཡང་མེད་པ་རེད་ཅེས་བཀོད་ཡོད་པ་རེད།

འདི་ལོ་ཕྱི་ཟླ་དགུ་པའི་ནང་ ཐེ་དབན་གྱི་བདེ་སྲུང་བློན་ཆེན་ཀའོ་ཧུཨ་ཅུ་ཨ་མི་རི་ཀར་ཕེབས་ཏེ f-16 རྟགས་ཅན་གྱི་མཁའ་དམག་གནམ་གྲུ་ཚོང་བསྒྱུར་གྱི་རེ་བསྐུལ་ཐད་ཤུགས་སྣོན་སྐྱོན་རྒྱུ་ཡིན་པ་ཐེ་དབན་གྱི་གསར་ཤོག་ཁག་ནང་གནས་ཚུལ་ཐོན་བཞིན་ཡོད་པ་རེད།།