ལ་དྭགས་བོད་ཕྲུག་ཁྱིམ་སྡེའི་སློབ་གྲྭ།

བོད་ཕྲུག་ཁྱིམ་སྡེ་ནི་ཕྱི་ལོ་ ༡༩༦༠ ལོར་བོད་ནས་འབྱོར་མ་ཐག་པའི་བུ་ཕྲུག་གསོ་སྐྱོང་ཁང་གི་ངོ་བོར་བཙུགས་པ་དང་། རིམ་བཞིན་སློབ་གྲྭའི་བསྟི་གནས་ཆེན་པོ་ཞིག་ཏུ་འཕེལ་རྒྱས་བྱུང་ཞིང་། འདས་ལོ་བཅུ་ཕྲག་དྲུག་ལྷག་གི་རིང་སློབ་ཕྲུག་ཁྲི་འཚོ་མང་པོར་ཤེས་ཡོན་གྱི་མདུན་ལམ་སྐྲུན་སླད་མཐུན་འགྱུར་སྦྱར་ཡོད། ད་ལྟའི་ཆར་རྒྱ་གར་གྱི་ས་ཁུལ་འདྲ་མིན་ནང་བོད་ཕྲུག་ཁྱིམ་སྡེའི་མ་ལག་མང་དག་ཅིག་དང་། གཏན་ཉིན་སློབ་གྲྭ་མང་པོ། ཤེས་ཡོན་གྱི་ལས་གཞི་གཞན་ཁག་ཀྱང་འཛིན་སྐྱོང་བྱེད་བཞིན་ཡོད། མ་ཟད་ཉེ་བའི་ཆར་འཛམ་གླིང་ས་ཕྱོགས་གང་ས་ནས་བོད་ཕྲུག་རྣམས་བོད་ཕྲུག་ཁྱིམ་སྡེའི་སློབ་གྲྭར་འཛུལ་ཞུགས་བྱེད་འགོ་བཙུགས་ཡོད། ལ་དྭགས་བོད་ཕྲུག་ཁྱིམ་སྡེའི་ཡན་ལག་ལ་མཚོན་ན།  དེ་ཕྱོགས་སུ་བོད་པའི་སློབ་ཕྲུག་ཙམ་མ་ཟད། ལ་དྭགས་བྱང་ཐང་གི་ས་ཁུལ་མང་པོ་ནས་སློབ་ཕྲུག་དང་། ས་གནས་ལ་དྭགས་པ་མི་ཉུང་བ་ཞིག་ལ་ཡང་ཤེས་ཡོན་གྱི་མཐུན་རྐྱེན་སྦྱར་དང་སྦྱོར་བཞིན་ཡོད། གནད་དོན་གླེང་མོལ་གྱི་ལས་རིམ་ནང་།  བོད་པའི་ཤེས་ཡོན་ལམ་ལུགས་དེས་ས་གནས་ལ་དྭགས་ལ་མཚོན་ན་ཤུགས་རྐྱེན་ཇི་ཙམ་ཐེབས་ཡོད་མེད་སོགས་ཀྱི་ཞིབ་རྟོག་སླད་ལ་དྭགས་ཁུལ་གྱི་མི་སེར་ཁྲོད་ནས་བོད་ཁྱིམ་དུ་སྐབས་དང་པོའི་སློབ་མ་སློབ་འཇུག་བྱས་པའི་གནས་སྟངས་རྒྱུས་ལོན་ཆེད་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱི་འགན་འཛིན་གཞོན་པ་བཀྲིས་དབང་ཕྱུག་ལགས་ཀྱིས་བཀའ་དྲི་ཞུས་པ་ཞིག་གསན་རོགས་གནང་།
གསར་འགོད་པ། བཀྲ་ཤིས་དབང་ཕྱུག
རྩོམ་སྒྲིག་པ། བསྟན་འཛིན་བདེ་སྐྱིད།
དྲྭ་ཐོག་སྤེལ་མཁན། ཡེ་ཤེས་བཀྲ་ཤིས།