ཚེ་རིང་པོ་སྡོད་དགོས་ན་སེམས་པ་བཟང་པོ་བྱ་གལ་ཆེ། ༧གོང་ས་མཆོག་གིས།

སྤྱི་ཟླ་༩བའི་ཚེས་༢༠རེས་གཟའ་ལྷག་པའི་ཉིན། བཞུགས་སྒར་རྒྱལ་བའི་ཕོ་བྲང་དུ་༧གོང་ས་སྐྱབས་མགོན་ཆེན་པོ་མཆོག་གིས་དེ་སྔ་བོད་གཞུང་དགའ་ལྡན་ཕོ་བྲང་གི་སྤྱི་ཁྱབ་མཁན་པོ་མཁྱེན་རབས་བསྟན་འཛིན་མཆོག་གི་ནང་མི་སྤུན་མཆེད་གཙོ་བོ་གྱུར་བའི་སློབ་ཕྲུག་དང་མང་ཚོགས་ཁག་ཅིག་ལ་མཇལ་ཁ་དང་བཀའ་སློབ་སྩལ་སྐབས། སྤྱི་ཁྱབ་མཁན་པོ་དམ་པ་མཁྱེན་རབས་བསྟན་འཛིན་ནི་༧གོང་ས་མཆོག་ལ་བཀའ་དྲིན་ཆེན་པོ་ཡིན་པ་བཀའ་གནང་ཞིང་། ༧གོང་ས་༧སྐྱབས་མགོན་ཆེན་པོ་མཆོག་སྐུ་ཆུང་ངུའི་དུས་སུ་མཁན་པོ་དམ་པ་དང་དམིགས་བསལ་འབྲེལ་བ་ཡོད་པ་མ་ཟད། འབྲེལ་བ་དེ་ཚེ་རབས་ནས་ཚེ་རབས་བར་གནས་རྒྱུ་ཡིན་པ་བཀའ་གནང་འདུག
སྤྱི་ཁྱབ་མཁན་པོ་ཞེས་པ་ནི་དེ་སྔ་བོད་གཞུང་དགའ་ལྡན་ཕོ་བྲང་གི་གཞུང་གི་ཆེས་མཐོའི་དཔོན་རིགས་ཀྱི་སྡེ་ཚན་ཞིག་ཡིན་ཞིང་། དེ་ནི་༧རྒྱལ་བ་༧སྐུ་ཕྲེང་བརྒྱད་པ་འཇམ་དཔལ་རྒྱ་མཚོའི་སྐུ་དུས་སུ་གསར་དུ་བསྐོ་གཞག་གནང་བ་ནས་བཟུང་བྱུང་བ་ཞིག་ཡིན་པ་དང་། རྩེ་ཕོ་བྲང་དང་ལྷ་སའི་ནོར་བུ་གླིང་ག་གཉིས་ཀའི་ནང་སྤྱི་ཁྱབ་མཁན་པོའི་ལས་དོན་བྱ་ཡུལ་སྒེར་ཤག་ཡོད་པ་མ་ཟད། སྐུ་བཅར་སྤྱི་ཁྱབ་མཁན་པོ་ཞེས་༧གོང་ས་མཆོག་གི་སྐུ་མདུན་དུ་གཏན་སྡོད་ཀྱིས་ལས་དོན་ཆེ་ཕྲ་གང་ཅིའི་ཐད་༧གོང་ས་མཆོག་ལ་གཞོགས་འདེགས་ཞུ་བ་དང་སྐུ་སྒེར་གྱི་ཕྱག་རྫས་ཚང་མར་དོན་དམ་བྱེད་མཁན་ཞིག་ཡིན་ཞིང་། མདོར་ན། སྤྱི་ཁྱབ་མཁན་པོ་ནི་༧གོང་ས་མཆོག་སྐུ་སྒེར་གྱི་ཕྱག་མཛོད་ལྟ་བུ་ཞིག་ཡིན་པ་ལོ་རྒྱུས་ནང་གསལ་ཡོད།

ཐེངས་འདིའི་མཇལ་ཁའི་སྐབས། ༧གོང་ས་སྐྱབས་མགོན་ཆེན་པོ་མཆོག་གིས། བོད་མི་ན་གཞོན་ཚོས་བོད་ཀྱི་ཆོས་དང་རིག་གཞུང་བཟང་པོ་ལ་དོ་སྣང་བྱེད་རྒྱུ་གལ་ཆེ་ཡིན་པ་དང་། གཞོན་སྐྱེས་ཚོ་ཚེ་རིང་པོ་སྡོད་དགོས་ན། སེམས་པ་བཟང་པོ་བྱ་དགོས་གལ་ཆེ་ལ། བོད་ཀྱི་ཆོས་དང་རིག་གཞུང་ནི་འཛམ་གླིང་ཡོངས་ལ་དགོས་མཁོ་ཆེ་བའི་སྤྱི་ནོར་ཡིན་ཞེས་དང་། དེ་སྔ་རྒྱ་བོད་ཧོར་གསུམ་ནང་སངས་རྒྱས་ཀྱི་བསྟན་པ་དར་ཁྱབ་ཆེན་པོ་ཕྱིན་ཡོད་ནའང་། བར་སྐབས་ཤིག་ནས་ཉམས་རྒུད་དུ་སོང་ཡོད། འོན་ཀྱང་། རྒྱ་ནག་ནང་དུ་ད་སྐབས་བོད་བརྒྱུད་ནང་བསྟན་ལ་དོ་སྣང་བྱེད་མཁན་ཇེ་མང་དུ་འགྲོ་མུས་ཡིན་པ་མ་ཟད། ༧གོང་ས་༧སྐྱབས་མགོན་ཆེན་པོ་སྐུ་ཉིད་ནི་བོད་ཀྱི་ཆོས་དང་རིག་གཞུང་གི་ངོ་ཚབ་ལྟ་བུ་ཞིག་ཡིན་ཞེས་བཀའ་གནང་འདུག
ཡང་མགོན་པོ་གང་ཉིད་མཆོག་གིས། ༧སྐྱབས་རྗེ་ཁྲི་བྱང་རིན་པོ་ཆེ་དང་ཁུ་ནུ་བླ་མ་རིན་པོ་ཆེ་བསྟན་འཛིན་རྒྱལ་མཚན་མཆོག་དབུས་པའི་བོད་ཀྱི་བླ་ཆེན་བཅུ་ཕྲག་གཉིས་ལྷག་གི་སྐུ་དྲུང་ནས་གསུང་ཆོས་དུ་མ་ཞིག་ཞུས་པའི་རྗེས་འབྲས་སུ། ད་ཆ་ངོས་ཀྱིས་ནང་པའི་གཞུང་ལུགས་ཐོག་ལ་ག་ལ་གང་མཚམས་ཞིག་བཤད་རྒྱུ་ཡོད་པ་ཆགས་ཡོད་ཅེས་བཀའ་གནང་བ་དང་ཆབས་ཅིག གཙོ་བོ་ཆེ་ཤོས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ཐུགས་ཉམས་ལེན་གནང་གི་ཡོད་པ་བཀའ་གནང་པ་དང་སྦྲེལ། སངས་རྒྱས་ཀྱི་ཆོས་ལུགས་ལ་གཙོ་བོ་སློབ་གཉེར་གནང་དགོས་པ་ལས། དད་པ་བྱས་པ་ཙམ་གྱི་འདང་གི་མེད་པ་བཀའ་གནང་འདུག
མཐའ་མཇུག་ཏུ་༧གོང་ས་སྐྱབས་མགོན་ཆེན་པོ་མཆོག་གིས། ད་སྐབས་གང་ཉིད་མཆོག་གི་༧སྐུ་ཁམས་གསལ་ཐང་ཡིན་པ་མ་ཟད། འབྱུང་འགྱུར་ལོ་ངོ་བརྒྱ་དང་བཅུ་ལྷག་འཚོ་བཞུགས་གནང་རྒྱུ་ཡིན་པ་བཀའ་གནང་འདུག

གསར་འགོད་པ། བློ་བཟང་དགེ་ལེགས།
རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།