ལྷ་སའི་གཙུག་ལག་ཁང་གི་སྒོ་ཆེན་མདུན་གྱི་ཕྱག་འཚལ་ས་བཀག་སྡོམ་བྱས་འདུག

རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་གཙུག་ལག་ཁང་གི་མདུན་ཐང་ཡོངས་སུ་སྔོག་ནས་བསྒྱུར་བཟོ་བྱས་བ་དང་མཉམ་གཙུག་ལག་ཁང་གི་སྒོ་ཆེན་མདུན་གྱི་ཕྱག་འཚལ་ས་བཀག་སྡོམ་བྱས་འདུག
འདི་ལོའི་ལོ་སྟོད་ནས་བཟུང་རྒྱ་ནག་གཞུང་གིས་ལྷ་སའི་རྣམ་པ་གོང་མཐོར་གཏོང་རྒྱུ་དང་། རྨང་གཞིའི་སྒྲིག་བཀོད་འཐུས་ཚང་གཏོང་རྒྱུ་ཡིན་ཚུལ་གྱིས། བོད་ཀྱི་རྒྱལ་ས་ལྷ་སའི་ཇོ་ཁང་ངམ་གཙུག་ལག་ཁང་གི་མདུན་ཐང་ཡོངས་སུ་བསྔོགས་ནས་ཟླ་ཤས་རིང་བསྒྱུར་བཟོའི་ལས་གཞི་སྤེལ་ཡོད་པ་དང་། ཉེ་བའི་སྤྱི་ཟླ་༨པའི་ནང་ཡོངས་སུ་འགྲུབ་ཡོད་ཀྱང་། གཙུག་ལག་ཁང་གི་མདུན་སྒོའི་རྡོ་གཅལ་ཐང་དུ་ནམ་རྒྱུན་དད་ལྡན་པ་མང་པོས་འཚང་ཁའི་ངང་ཕྱག་འཚལ་ནས་གསོལ་བ་སྨོན་ལམ་རྒྱག་ས་ད་ཆ་ལྕགས་དྲྭས་སྐོར་ནས་བཀག་ཡོད་འདུག

དེའི་ཐད་ཉེ་ལམ་ལྷ་སར་གནས་མཇལ་དུ་ཕེབས་པའི་འབྲེལ་ཡོད་མི་སྣ་ཞིག་གིས་འདི་གའི་རླུང་འཕྲིན་ཁང་ལ་བརྗོད་པ་ལྟར་ན། ལྷ་སའི་གཙུག་ལག་ཁང་གི་མདུན་སྒོའི་རྡོ་གཅལ་ཐང་དུ། དེང་སྐབས་སྔོན་ལྟར་ཕྱག་འཚལ་ནས་སྡོད་ས་མེད་པར་ཡོངས་སུ་ལྕགས་དྲྭས་བསྐོར་ནས་བཀག་འདུག་ལ། ལྕགས་དྲྭའི་ནང་རྒྱ་རིགས་ཡུལ་སྐོར་སྤྲོ་འཆམ་པ་དང་རྒྱ་ནག་གི་སྐོར་སྲུང་བ་ལས་མཐོང་རྒྱུ་མི་འདུག གནའ་སྔ་མོ་ནས་དད་ལྡན་པ་དང་མདོ་དབུས་ཁམས་གསུམ་གྱི་དབུས་མཇལ་བ་ཚོས་གཙུག་ལག་ཁང་གི་མདུན་སྒོ་རང་ནས་ཕྱག་སྐོར་ལེན་བྱེད་བཞིན་པ་དེ་མཐོང་རྒྱུ་མེད་པས་བློ་བདེ་བོ་མ་བྱུང་། ཡིན་ཡང་ཕྱག་འཚལ་ས་བཀག་སྡོམ་བྱས་བ་དེ་གཏན་དུ་བཀག་སྡོམ་བྱས་བ་ཡིན། ཡང་ན་གནས་སྐབས་ཙམ་ལ་བཀག་སྡོམ་བྱས་བ་ཡིན་ད་དུང་གནས་ཚུལ་གསལ་ཆ་མ་བྱུང་ཟེར།
ཡང་ཉེ་ལམ་གཙུག་ལག་ཁང་གི་མདུན་ཐང་བཟོ་བཅོས་ལས་གཞི་དེའི་ཁྲོད། ཐང་ཆེན་གྱི་རྡོ་གཅལ་དང་། ས་འོག་གི་སྦུ་གུ་བརྗེ་སྤོར་བྱས་པ་དང་མཉམ་དུ། གཙུག་ལག་ཁང་གི་མདུན་ཐང་དུ་གང་སར་ལྕགས་དྲྭས་སྐོར་ནས་གང་བྱུང་འགྲོ་བསྐྱོད་མི་ཐུབ་པ་བཟོས་འདུག་པར་མ་ཟད། ཞིབ་བཤེར་ས་ཚུགས་དང་ཞིབ་བཤེར་འཛུལ་སྒོ་ཇེ་མང་དུ་བཏང་ཡོད་པ་ལྷ་ས་ནས་དངོས་སུ་མཐོང་བའི་བོད་མི་ཞིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ངོ་སྤྲོད་གནང་ཡོད།

ད་དུང་ཁོང་གིས་གཙུག་ལག་ཁང་གི་མདུན་ཐང་བསྒྱུར་བཟོའི་ལས་གཞིའི་སྐབས། ཁུལ་དེར་མི་སྣ་གཅིག་ཀྱང་འགྲོ་བསྐྱོད་མི་ཆོག་པར་ཡོངས་སུ་བཀག་སྡོམ་བྱས་ཡོད་པ་དང་། ད་ཆ་གཙུག་ལག་ཁག་གི་མདུན་ཐང་དུ་ལྕགས་རྭ་དང་ཞིབ་བཤེར་འཛུལ་སྒོ་ཇེ་མང་དུ་བཏང་བ་དེས། དད་ལྡན་པ་ཚོ་མཆོད་མཇལ་དང་བསྐོར་བ་བྱེད་པར་སྟབས་མི་བདེ་བ་བཟོས་པ་དང་། དོན་དངོས་ལས་གཞི་དེས། ནམ་རྒྱུན་གཙུག་ལག་ཁང་གི་མདུན་དང་བར་སྐོར་སོགས་ལ་ཡོད་པའི་རྒྱ་ནག་གི་ཉེན་རྟོག་པ་དང་གསང་བའི་མི་སྣ་ཚོར་ལས་དོན་སྤེལ་རྒྱུ་སྟབས་བདེ་རུ་བཏང་ཡོད་པ་མངོན་གསལ་ཡིན་པ་ཡང་ངོ་སྤྲོད་གནང་བྱུང་།

དེའི་སྔོན་སྤྱི་ཟླ་༥་བའི་ནང་། རྒྱ་ནག་ཝུའུ་ཧན་ནས་མཆེད་པའི་ཀོ་ཝིཌ་༡༩་ཏོག་དབྱིབས་ནད་ཡམས་ཁྱབ་གདལ་ཆེ་བའི་རྐྱེན་མི་ཚོགས་འདུ་འཛོམས་དང་འགྲོ་བསྐྱོད་བཀག་སྡོམ་བྱས་ཡོད་པའི་བར་སྐབས་དེར། རྒྱ་ནག་གཞུང་གིས་ལྷ་སའི་གཙུག་ལག་ཁང་གི་མདུན་དུ་ཡོད་པའི་ལོ་རྒྱུས་ལྡན་པའི་དབོན་ཞང་རྡོ་རིང་ཐོག་བོད་ཀྱི་སྲོལ་རྒྱུན་དགོན་སྡེའི་ཨར་ལས་འཛུགས་སྐྲུན་དང་མི་མཐུན་པའི་རྒྱ་ལུགས་ཀྱི་ལྡིང་ཁང་གཉིས་ཀྱང་གསར་བསྐྲུན་བྱས་ཡོད་པ་རེད།