དབོན་སྟོད་དགོན་པའི་ཕྱག་མཛོད་བགྲེས་པ་བསྟན་འཛིན་དང་དབོན་སྟོད་གྲོང་ཚོའི་ལས་བྱེད་རྟ་མགྲིན་སོགས་དབོན་སྟོད་ཁུལ་གྱི་འགོ་ཁྲིད་ཁག་ཅིག་སྡེ་དགེ་རྫོང་གི་བཀག་ཉར་ཁང་དུ་བསྐྱེལ་འདུག

ཕྱི་ལོ་ ༢༠༢༤ ལོའི་ཟླ་ ༢ ཚེས་ ༢༣ ཉིན་རྒྱ་ནག་གཞུང་གིས་འཛིན་བཟུང་བྱས་པའི་དགེ་འདུན་པ་དང་མང་ཚོགས་བརྒྱ་ཕྲག་མང་པོ་ཡོད་པ་རྣམས་རིམ་གྱིས་གློད་གྲོལ་བཏང་སྟེ་ད་ཆ་མང་ཆེ་བ་གློད་ཟིན་ཡོད་འདུག་ན་ཡང་། དབོན་སྟོད་དགོན་གྱི་ཕྱག་མཛོད་བགྲེས་པ་བསྟན་འཛིན་ལགས་དང་། གྲོང་ཚོའི་ལས་བྱེད་པ་རྟ་མགྲིན་ལགས་སོགས་ངོ་རྒོལ་ཞུ་འབོད་ཀྱི་སྣེ་ཁྲིད་པ་ཡིན་པར་དོགས་པ་བྱ་ཡུལ་གྱི་མི་སྣ་ཁག་ཅིག་དབོན་སྟོད་ཁུལ་གྱི་བཀག་ཉར་ཁང་ནས་སྡེ་དགེ་རྫོང་གི་བཀག་ཉར་ལྟ་སྲུང་ཁང་དུ་ཕྱི་ཟླ་ ༣ ཚེས་ ༣ ཉིན་བསྐྱེལ་ཡོད་པ་ཨེ་ཤེ་ཡ་རང་དབང་རླུང་འཕྲིན་ཁང་ལ་བོད་ནས་རང་ཉིད་ཀྱི་བདེ་འཇགས་སྲུང་སྐྱོབ་ཆེད་མིང་འབོད་མ་བྱེད་པའི་མི་སྣ་ཁག་ཅིག་གིས་བརྗོད་བྱུང་།

ཁོང་ཚོ་དུས་ཡུན་གང་ཙམ་བཀག་ཉར་བྱེད་མིན་དང་། ཁོང་ཚོར་ཁྲིམས་བཅད་གཏོང་མིན་སོགས་ཚོད་དཔག་ཐུབ་རྒྱུ་ཁག་པོ་ཡིན་པ་གནས་ཚུལ་མཁོ་སྤྲོད་པ་གཞན་ཞིག་གིས་བརྗོད་བྱུང་ལ། ཁོང་ཚོ་གཟའ་འཁོར་གསུམ་ཙམ་རིང་ཁྲིམས་ཁང་གི་ཡིག་ཆ་གང་ཡང་མེད་པའི་ཐོག་ནས་མུ་མཐུད་བཀག་ཉར་འོག་བཞག་པ་ནི་རྒྱ་ནག་རྒྱལ་ཁབ་ཀྱི་ཁྲིམས་དང་འགལ་བ་ཞིག་རེད་ཅེས་བརྗོད་བྱུང་།

ཡང་ཨེ་ཤེ་ཡ་རང་དབང་རླུང་འཕྲིན་ཁང་ནས་གནས་ཚུལ་ཤེས་རྟོགས་བྱུང་བར་གཞིགས་ན།  ཕྱི་ཟླ་ ༢ ཚེས་ ༢༣ ཉིན་མི་གྲངས་ ༡༠༠༠ ཙམ་འཇུ་བཟུང་བྱས་པ་དེ་དག་རིམ་པས་གློད་གྲོལ་གཏོང་བཞིན་འདུག་ཀྱང་། ཧ་ཅང་གསང་བ་ཆེན་པོའི་སྒོ་ནས་དགོང་དྲོའི་དུས་ཚོད་ཤ་སྟག་ཏུ་གློད་གྲོལ་བཏང་ཡོད་འདུག

འོན་ཀྱང་ས་གནས་ཀྱི་གནས་སྟངས་ཧ་ཅང་དམ་དྲགས་ཆེན་པོའི་ངང་གནས་འདུག་ལ། དམིགས་བསལ་དབོན་པོ་སྟོད་ནང་བྱུང་བའི་གནས་ཚུལ་དྲ་ལམ་ཐོག་ཁྱབ་སྤེལ་བྱེད་མཁན་གྱི་མི་སྣ་འཇུ་བཟུང་བྱས་དང་བྱེད་མུས་ཡིན་པ་བོད་ནས་གནས་ཚུལ་མཁོ་སྤྲོད་པ་གཞན་ཞིག་གིས་བརྗོད་བྱུང་།

དབོན་པོ་སྟོད་ཁུལ་རྒྱ་ནག་གཞུང་གི་ལས་བྱེད་པས། མི་སྒེར་གྱི་ལག་ཐོག་ཁ་པར་ནང་གི་སྐད་འཕྲིན་ (WeChat)དང་ཁྱུག་དབྱིངས་ (TikTok) སོགས་ལ་བརྟག་དཔྱད་ནན་པོ་བྱེད་བཞིན་འདུག་པ་མ་ཟད། སྡེ་དགེའི་ས་གནས་དེའི་ཁུལ་དུས་ཟིང་གི་གནས་ཚུལ་དང་མི་གྲངས་ ༡༠༠༠ ཙམ་འཇུ་བཟུང་གི་གནས་ཚུལ་བྱུང་སྟེ་གཟའ་འཁོར་གཉིས་ཙམ་ཕྱིན་པའི་རྗེས་སུའང་ས་གནས་ཀྱི་འབྲེལ་མཐུད་ཁ་པར་དང་དྲ་ལམ་མཐུན་རྐྱེན་མུ་མཐུད་ཚད་བཀག་སྟངས་འཛིན་བྱེད་བཞིན་ཡོད་འདུག

ཨེ་ཤེ་ཡ་རང་དབང་རླུང་འཕྲིན་ཁང་ལ་གནས་ཚུལ་མཁོ་སྤྲོད་བྱུང་བ་ལྟར་ན། གནས་ཚུལ་ཕྱིར་གྱར་བྱེད་པའི་ཉེས་འཛུགས་འོག་འཇུ་བཟུང་བྱས་པའི་མི་ཚོར་འདྲི་རྩད་ཚ་ནན་དང་ཉེས་བརྡུང་བཏང་པ། འགའ་ཤས་ལ་ཁ་ལག་མ་སྤྲད་པ་སོགས་བྱས་ཡོད་འདུག

དབོན་པོ་སྟོད་ཁུལ་དང་སྡེ་དགེ་རྫོང་གི་ཞི་དྲག་གི་དཔོན་རིགས་ཚོས་ས་གནས་སུ་དུས་ཟིང་འགོག་ཐབས་ཐད་དྲག་གནོན་ཤུགས་ཆེ་བྱེད་བཞིན་པའི་འོག་ས་གནས་མི་མང་ཚོ་ཧ་ཅང་གི་ཞེད་སྣང་ཆེན་པོའི་འོག་གནས་བཞིན་འདུག་པ་དང་། ཕྱི་ཕྱོགས་སུ་ཡོད་པའི་རང་གི་ནང་མི་ཚོས་ཀྱང་འབྲེལ་གཏུག་མི་བྱེད་པའི་རེ་བ་བྱེད་བཞིན་ཡོད་འདུག

ཡང་བོད་ནས་གནས་ཚུལ་མཁོ་སྤྲོད་པ་གཞན་ཞིག་གིས། དབོན་སྟོད་ཁུལ་གྱི་ས་གནས་ཡུལ་མི་དང་དགེ་འདུན་པ་ཚོ་ནི་བསམ་བློ་སྟབས་བདེ་གཏོང་མཁན་དང་ཉམས་ཆུང་ངང་སྡོད་མཁན་རིགས་ཡིན་ན་ཡང་། ཁོང་ཚོའི་ཐོག་བཟོད་མ་ཐུབ་པའི་དྲག་སྤྱོད་སྤེལ་བཞིན་པར་བརྟེན་ཁོང་ཁྲོ་བྱེད་མཁན་ཇེ་མང་དུ་འགྲོ་བཞིན་ཡོད་འདུག་པ་དང་། གལ་ཏེ་གཞུང་ཕྱོགས་ནས་བཙན་ཤེད་ངང་ཁོང་ཚོ་གནས་སྤོ་བྱེད་བཅུག་ཚེ་དྲག་པོའི་ངོ་རྒོལ་ཡང་ཡོང་སྲིད་པ་རེད་ཅེས་བརྗོད་བྱུང་།

* སྡེ་དགེ་དང་འབྲེལ་བའི་དེའི་སྔོན་གྱི་གནས་ཚུལ་ཁག ཟླ་གཉིས་བའི་ཚེས་༡༤ ཚེས་༢༠ ཚེས་༢༢ ཚེས་༢༤ ཚེས་༢༥ ཚེས་༢༧ ཟླ་གསུམ་པའི་ཚེས་༠༦

གསར་འགོད་པ། སྐལ་ལྡན་བློ་གྲོས། བསྟན་འཛིན་པདྨ།
རྩོམ་སྒྲིག་པ། སྐལ་ལྡན་བློ་གྲོས།
དྲྭ་ཐོག་སྤེལ་མཁན། ཡེ་ཤེས་ཟླ་བ།