១. ក្រុមអ្នកវិភាគព្រមានពីការបែកបាក់ឯកភាពជាតិកាន់តែធ្ងន់ធ្ងរក្នុងឆ្នាំ២០២៣
ក្រុមអ្នកវិភាគព្រមានពីការបែកបាក់ឯកភាពជាតិកាន់តែធ្ងន់ធ្ងរក្នុងសង្គមកម្ពុជានៅក្នុងឆ្នាំថ្មី ឆ្នាំ២០២៣ ដែលនឹងឈានចូលមកដល់នាពេលដ៏ខ្លីខាងមុខនេះ។ ឆ្នាំថ្មីនេះគឺជាឆ្នាំដែលកម្ពុជារៀបចំការបោះឆ្នោតជាតិជ្រើសតាំងតំណាងរាស្ត្រអាណត្តិទី៧។ ពួកគេមើលឃើញថា ការបន្តបែកបាក់ឯកភាពជាតិនេះគឺដោយសារតែគណបក្សកាន់អំណាចដាក់ចេញនូវគោលនយោបាយតាមកម្ចាត់ក្រុមអ្នកប្រឆាំង ឬមាននិន្នាការផ្ទុយពីរដ្ឋាភិបាល។ អានព័ត៌មានពិស្តារ ...
២. តើបណ្ដាប្រទេសប្រជាធិបតេយ្យ និងសហគមន៍អន្តរជាតិរំពឹងយ៉ាងណាពីការបោះឆ្នោតឆ្នាំ២០២៣ ?
ពេញមួយឆ្នាំ២០២២ ដែលជិតនឹងឆ្លងផុតនៅប៉ុន្មានថ្ងៃខាងមុខនេះ លោកនាយករដ្ឋមន្ត្រី ហ៊ុន សែន នៅតែបន្តជាប់ឈ្មោះជាមេដឹកនាំ ដែលបាន គាស់រំលើងប្រជាធិបតេយ្យ និងរំលោភបំពានសិទ្ធិពលរដ្ឋ។ ស្ថានភាពប្រជាធិបតេយ្យ និងសិទ្ធិមនុស្សនៅតែមិនអាចវិលទៅ រកស្ថានភាពប្រសើរបាន បើទោះបីជាបណ្ដាសហគមន៍អន្តរជាតិ និងមេដឹកនាំប្រទេសប្រជាធិបតេយ្យ បានលើកឡើងពីបញ្ហានេះនៅចំពោះមុខ មន្ត្រីជាន់ខ្ពស់នៃរដ្ឋាភិបាល លោក ហ៊ុន ម៉ាណែត ដែលជាបេក្ខជននាយករដ្ឋមន្ត្រីអនាគតកាលរបស់បក្សកាន់អំណាច ឬនៅចំពោះមុខ លោក ហ៊ុន សែន ក្ដី។
តើស្ថានភាពប្រជាធិបតេយ្យនៅកម្ពុជានឹងប្រែប្រួលយ៉ាងណានៅក្នុងឆ្នាំ២០២៣ខាងមុខ នៅពេលកម្ពុជារៀបចំការបោះឆ្នោតជាតិនីតិកាលទី៧? តើបណ្ដាប្រទេសប្រជាធិបតេយ្យ និងសហគមន៍អន្តរជាតិរំពឹងយ៉ាងណាពីការបោះឆ្នោតនេះ?
៣ . ក្រុមអ្នកឃ្លាំមើលថា ការបោះឆ្នោតឆ្នាំ២០២៣គណបក្សប្រជាជនកម្ពុជានឹងថយសំឡេងគាំទ្រ
ក្រុមអ្នកឃ្លាំមើលលើកឡើងថា ការបោះឆ្នោតឆ្នាំ២០២៣ខាងមុខ គណបក្សប្រជាជនកម្ពុជា នឹងបាត់បង់ការគាំទ្រមួយចំនួនធំ ដែលមិនអាចធ្វើឱ្យគណបក្សកាន់អំណាចចាស់វស្សាមួយនេះ ដឹកនាំប្រទេសដោយឯកបក្សបានទៀតឡើយ។ ប៉ុន្តែ អ្នកនាំពាក្យគណបក្សប្រជាជនកម្ពុជា ទទួលស្គាល់ថា គណបក្សប្រជាជនកម្ពុជា អាចនឹងបាត់បង់កៅអីក្នុងសភាខ្លះ ប៉ុន្តែមិនប៉ះពាល់ដល់ការដឹកនាំរដ្ឋាភិបាលនោះទេ។ អានព័ត៌មានពិស្ដារ ...
៤ . មន្រ្តីបក្សប្រឆាំងនិងអ្នកវិភាគចាត់ទុកការលក់ស្នាក់ការបក្សសង្គ្រោះជាតិយកលុយចែកគ្នា បង្ហាញពីទង្វើកំសាករបស់លោក ហ៊ុន សែន
មន្រ្តីគណបក្សប្រឆាំង និងអ្នកវិភាគនយោបាយរិះគន់ថា លោក ហ៊ុន សែន ដែលលក់ឡៃឡុងផ្ទះរបស់លោក សម រង្ស៊ី និងជាទីស្នាក់ការបក្សសង្គ្រោះជាតិ ហើយយកលុយចែកគ្នា។ អ្នកវិភាគថា ទង្វើរបស់លោក ហ៊ុន សែន និងបក្ខពួក គឺជាអំពើលួចប្លន់យកទ្រព្យអ្នកដទៃ ព្រមទាំងបង្ហាញពីទង្វើក៏កំសាករបស់ក្រុមមេដឹកនាំ។ ប្រតិកម្មនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសកាលពីថ្ងៃទី២២ ខែធ្នូ ថា គេហដ្ឋានរបស់លោក សម រង្ស៊ី និងជាទីស្នាក់ការបក្សប្រឆាំងនៅសង្កាត់ចាក់អង្រែលើនោះ ត្រូវបានលក់ក្នុងតម្លៃ ១លាន៦សែនដុល្លារ ដើម្បីយកលុយមកសងជំងឺចិត្តលោក និងថ្នាក់ដឹកនាំគណបក្សប្រជាជនកម្ពុជាផ្សេងទៀត។ អានព័ត៌មានពិស្តារ ...
៥. លោក កឹម សុខា ស្នើឱ្យអ្នកនយោបាយបញ្ឈប់វប្បធម៌មានឯងអត់អញ មានអញអត់ឯង និងការលាបពណ៌គ្នា
ប្រធានគណបក្សប្រឆាំង លោក កឹម សុខា បានចេញសារអបអរសាទរទិវាឆ្លងឆ្នាំសកលចូលឆ្នាំថ្មី២០២៣ រួមនឹងសារអំពាវនាវដល់អ្នកនយោបាយឱ្យបញ្ឈប់វប្បធម៌លាបពណ៌គ្នា និងការបើប្រាស់សារនយោបាយកន្លងដែលថា «មានអញអត់ឯង មានឯងអត់អញ»។ អានព័ត៌មានពិស្ដារ ...
៦. អ្នកសិក្សាផ្នែកច្បាប់និងមន្ត្រីអង្គការសង្គមស៊ីវិលថា លោក ហ៊ុន សែន គួរបើកលំហប្រជាធិបតេយ្យឡើងវិញ ដើម្បីទទួលបានអត្ថប្រយោជន៍សេដ្ឋកិច្ច
បើទោះបីជាលោកប្រធានាធិបតីអាមេរិក ចូ បៃឌិន (Joe Biden) បានស្នើឱ្យលោកនាយករដ្ឋមន្ត្រី ហ៊ុន សែន បើកលំហលទ្ធិប្រជាធិបតេយ្យ និងលើកកម្ពស់ការគោរពសិទ្ធិមនុស្សឡើងវិញ កាលពីជំនួបទ្វេភាគីក្នុងពេលកិច្ចប្រជុំកំពូលអាស៊ានកាលពីខែវិច្ឆិកា នោះយ៉ាងណាក្ដី ក៏រដ្ឋាភិបាល លោក ហ៊ុន សែន បានធ្វើផ្គើនចំពោះការស្នើសុំទាំងនោះទៅវិញ។ អ្នកសិក្សាផ្នែកច្បាប់ និងមន្ត្រីអង្គការសង្គមស៊ីវិលលើកឡើងថា ដើម្បីទទួលបានអត្ថប្រយោជន៍សេដ្ឋកិច្ចជាតិ លោក ហ៊ុន សែន គួរបើកលំហប្រជាធិបតេយ្យឡើងវិញ ទើបជាការប្រសើរ។ អានព័ត៌មានពិស្តារ ...
៧ . អ្នកវិភាគនយោបាយថា មានប៉ូលនយោបាយសំខាន់តែ២ ដែលប្រជាពលរដ្ឋនឹងជ្រើសរើសក្នុងការប្រកួតប្រជែងបោះឆ្នោតឆ្នាំ២០២៣
អ្នកស្រាវជ្រាវការអភិវឌ្ឍសង្គម និងអ្នកវិភាគនយោបាយលើកឡើងថា ការបោះឆ្នោតថ្នាក់ជាតិឆ្នាំ២០២៣ ខាងមុខ ប្រជាពលរដ្ឋនឹងមានភាពងាយស្រួលក្នុងការសម្រេចចិត្តជ្រើសរើសគណបក្សនយោបាយដែលខ្លួនពេញចិត្ត ដោយសារពលរដ្ឋអាចបែងចែកកាន់តែច្បាស់ ពីគណបក្សនយោបាយដែលគាំទ្រគណបក្សកាន់អំណាច និងគណបក្សនយោបាយដែលមានសក្ដានុពល ប្រកួតប្រជែងជាមួយគណបក្សប្រជាជនកម្ពុជា។
៨ . តើអ្នកប្រជាធិបតេយ្យគួរធ្វើបែបណាដើម្បីយកឈ្នះដៃគូនយោបាយប្រជាភិថុតិឆ្ពោះទៅរកការបោះឆ្នោតដោយត្រឹមត្រូវ ?
អស់រយៈពេលជិត៤០ឆ្នាំ ក្រោមការដឹកនាំដោយរដ្ឋាភិបាល លោក ហ៊ុន សែន តែងតែប្រើប្រាស់សារនយោបាយជេរប្រមាថខ្លាំងៗ មកលើប្រជាពលរដ្ឋ និង ធ្វើទុក្ខបុកម្នេញសកម្មជនសិទ្ធិមនុស្ស-បរិស្ថាន ក្រុមសហជីព និងសកម្មជន នយោបាយជាបន្តបន្ទាប់ តាមរយៈការចាប់ខ្លួនពួកគេដាក់ពន្ធនាគារ រងបទចោទ ពីតុលាការ និងអ្នកខ្លះបង្ខំចិត្តនិរទេសខ្លួនទៅក្រៅប្រទេស ដើម្បីគេចផុត ពីការយាយីរបស់អាជ្ញាធរគណបក្សកាន់អំណាច។ អានព័ត៌មានពិស្តារ ...
៩ . អ្នកវិភាគថា លោក ហ៊ុន សែន អះអាងថា វិបត្តិដីធ្លីកើតឡើងដោយសារតែដីឡើងថ្លៃ ជាការបិទបាំងពីអសមត្ថភាពដោះស្រាយ
លោកនាយករដ្ឋមន្រ្តី ហ៊ុន សែន អះអាងថា ជម្លោះដីធ្លីកើតមានពាសពេញប្រទេសនោះ ដោយសារតែកម្ពុជាមានសន្តិភាព ដីឡើងថ្លៃ ហើយពលរដ្ឋដណ្ដើមដីគ្នា។ ក្រុមអង្គការសង្គមស៊ីវិល និងអ្នកវិភាគអះអាងផ្ទុយពីនេះ។ ពួកគេលើកឡើងថា លោក ហ៊ុន សែន កំពុងតែបំភ័ណ្ឌការពិត ដើម្បីបិទបាំងពីអសមត្ថភាពរបស់ខ្លួន។
១០. លោក សុន ឆ័យ រក្សាជំហរចូលបំភ្លឺនៅតុលាការកំពូលក្នុងសំណុំរឿងដែលលោកចាញ់ក្ដីបក្សកាន់អំណាចនិងគ . ជ . ប
ពាក់ព័ន្ធនឹងអនុប្រធានគណបក្សភ្លើងទៀនវិញ លោក សុន ឆ័យ រក្សាជំហរចូលបំភ្លឺនៅតុលាការកំពូល ដែលជាសវនាការលើបណ្ដឹងសាទុក្ខរបស់លោក បន្ទាប់ពីតុលាការថ្នាក់ក្រោមបានកាត់ក្ដីឱ្យលោកចាញ់គណបក្សប្រជាជនកម្ពុជា និងគណៈកម្មាធិការជាតិរៀបចំការបោះឆ្នោត (គ.ជ.ប)។
មន្ត្រីសង្គមស៊ីវិលដែលតាមដានដំណើររឿងនេះ យល់ថា ប្រសិនបើស្ថានភាពនយោបាយដូចសព្វថ្ងៃនេះ លោក សុន ឆ័យ ពិបាកនឹងទទួលបានយុត្តិធម៌ពីតុលាការណាស់។ អានព័ត៌មានពិស្ដារ ...
១១. អ្នកវិភាគនយោបាយថា កម្ចីដែលគ្មានលក្ខខណ្ឌលើកកម្ពស់ការគោរពសិទ្ធិមនុស្ស ធ្វើឲ្យប្រជាពលរដ្ឋកាន់តែក្រីក្រ
អ្នកវិភាគនយោបាយលើកឡើងថា ប្រាក់កម្ចីរបស់ចិនដែលគ្មានលក្ខខណ្ឌឱ្យលើកកម្ពស់ការគោរសិទ្ធិមនុស្ស មិនត្រឹមតែមិនបានលើកកម្ពស់ជីវភាពរបស់ប្រជាពលរដ្ឋប៉ុណ្ណោះទេ ប៉ុន្តែក៏អាចនាំឱ្យប្រជាពលរដ្ឋកាន់តែធ្លាក់ខ្លួនក្រីក្របន្ថែមទៀតដែរ។ ការលើកឡើងនេះ គឺបន្ទាប់ពីលោកនាយករដ្ឋមន្ត្រី ហ៊ុន សែន បានអះអាងជាថ្មីទៀតថា កម្ចីរបស់ប្រទេសចិនមានភាពងាយស្រួលដើម្បីទទួលយក ព្រោះចិនបានផ្ដល់ប្រាក់កម្ចីទៅតាមផែនការដែលរដ្ឋាភិបាលចង់បាន។ អានព័ត៌មានពិស្ដារ ...
១២ . ចំនួនអ្នកស្លាប់ក្នុងហេតុការណ៍ឆេះអាគារកាស៊ីណូនៅប៉ោយប៉ែតកើនឡើងដល់ ២៥នាក់
ចំនួនអ្នកស្លាប់នៅក្នុងហេតុការណ៍ឆេះអគារកាស៊ីណូ ហ្គ្រេន ដាយមិន ស៊ីធី (Grand Diamond City) នៅទីក្រុងប៉ោយប៉ែត បន្តកើនឡើងដល់ចំនួន២៥នាក់ និងជនរងគ្រោះជិត១រយ(១០០)នាក់ គិតត្រឹមរសៀលថ្ងៃទី៣០ ខែធ្នូ ខណៈក្រុមជួយសង្គ្រោះកម្ពុជា-ថៃ កំពុងបន្តរុករកជនរងគ្រោះ។ ទន្ទឹមគ្នានេះ ពលរដ្ឋជាច្រើននាក់ កំពុងស្រែកទ្រហោយំ និងកាន់រូបថតសាច់ញាតិដែលបាត់ខ្លួន។ បុគ្គលិកកាស៊ីណូដែលរួចជីវិតពីភ្នក់ភ្លើង អះអាងថា មូលហេតុដែលបណ្ដាលឱ្យអគ្គីភ័យឆេះលឿន បណ្ដាលមកពីកង្វះខាតឧបករណ៍សង្គ្រោះបឋមនៅក្នុងអគារ និងការជួយសង្គ្រោះមានភាពយឺតយ៉ាវ។ អានព័ត៌មានពិស្ដារ ...
១៣ . ក្រសួងយុត្តិធម៌ ស្នើលើកលែងនិងបន្ថយទោសដល់អ្នកជាប់ឃុំជិតបីរយនាក់ក្នុងថ្ងៃ៧ មករា
ក្រសួងយុត្តិធម៌ស្នើឲ្យរដ្ឋាភិបាលលើកលែងទោសអ្នកទោសស្ត្រីម្នាក់ និងបន្ធូរបន្ថយទោសដល់អ្នកជាប់ឃុំជិតបីរយនាក់(២៨២) ក្នុងនោះមានស្រី២៧នាក់ ក្នុងទិវារម្លឹកខួបថ្ងៃ៧មករា ដែលនឹងប្រារព្ធឡើងមួយសប្ដាហ៍ទៀតនេះ។ អានព័ត៌មានពិស្ដារ ...
១៤. សមាគមគ្រូបង្រៀនកម្ពុជាឯករាជ្យ និងសកម្មជនសង្គមដើរហែក្បួនទាមទារដោះលែងគ្រូបង្រៀននិងអ្នកទោសមនសិការ
សមាគមគ្រូបង្រៀនកម្ពុជាឯករាជ្យ អតីតអ្នកទោសមនសិការ ក្រុមស្ត្រីថ្ងៃសុក្រ និងបុគ្គលិកក្រុមហ៊ុនណាហ្គា វើលដ៍ (Naga World) ប្រមាណ១០០នាក់ កាលពីថ្ងៃទី៣០ ធ្នូ បានចេញតវ៉ាដាក់ញត្តិ ដើម្បីទាមទារឱ្យអាជ្ញាធរដោះលែងគ្រូបង្រៀន និងអ្នកមនសិការដែលកំពុងជាប់ឃុំនៅក្នុងពន្ធនាគារ។ ទោះយ៉ាងណាក្រុមសមត្ថកិច្ច មិនបានឱ្យក្រុមអ្នកតស៊ូមតិដើរក្បូនចប់ចុងចប់ដើមទេ ដោយតម្រូវក្រុមអ្នកទាមទារបញ្ឈប់ដំណើរត្រឹមមុខសាលាដំបូងរាជធានីភ្នំពេញ ហើយតំណាងមន្ត្រីចេញមកទទួលញត្តិ។ អានព័ត៌មានពិស្ដារ ...
១៥. អាជ្ញាធរថៃនៅមិនទាន់ដោះលែងខ្មែរក្រោមបួននាក់
អាជ្ញាធរថៃ នៅមិនទាន់ដោះលែងពលរដ្ឋខ្មែរក្រោមភៀសខ្លួនចំនួនបួននាក់ ឲ្យមានសេរីភាពឡើងវិញទេ បន្ទាប់ពីជាប់ពន្ធនាគារជាងពីរខែមកហើយ។ អាជ្ញាធរថៃ បានចាប់ពួកគាត់ នៅពេលដែលពួកគាត់កំពុងធ្វើការនៅផ្សារបន្លែមួយ ក្នុងខេត្តប៉ាថុមថានី (Pathum Thani) ជាយក្រុងបាងកក ដោយចោទពីបទចូលប្រទេសថៃដោយខុសច្បាប់ និងធ្វើការដោយគ្មានឯកសារការងារ កាលពីថ្ងៃ១៤ ខែតុលា។
១៦. ពលរដ្ឋនៅក្រៅប្រទេសចង់បានសុខសន្តិភាពនិងការរីកចំរើនសំរាប់ពលរដ្ឋនៅកម្ពុជា
ប្រជាពលរដ្ឋខ្មែររស់នៅក្រៅប្រទេស ទោះបីជាឃ្លាតឆ្ងាយពីប្រទេសកំណើតរបស់ខ្លួនក៏ដោយ ក៏ពួកគេនៅតែគិតគូរដល់ប្រទេសជាតិ និងចង់បានការអភិវឌ្ឍន៍ជាតិពិតប្រាកដ ដើម្បីលើកកម្ពស់ជីវភាពរស់នៅរបស់ពលរដ្ឋខ្មែរទូទៅ។ ពួកគេក៏អំពាវនាវដល់រដ្ឋាភិបាលលោកនាយករដ្ឋមន្ត្រី ហ៊ុន សែន ឲ្យងាកមកគោរពសិទ្ធិមនុស្ស និងលទ្ធិប្រជាធិបតេយ្យឡើងវិញ ដើម្បីឲ្យគណបក្សនយោបាយដទៃទៀត អាចចូលរួមប្រកួតប្រជែងក្នុងការបោះឆ្នោតជាតិ នៅខែកក្កដាខាងមុខ ប្រកបដោយសេរី ត្រឹមត្រូវ និងយុត្តិធម៌។
១៧ . ពលរដ្ឋរស់នៅក្បែរបឹងតាមោកជាង១រយនាក់ស្រែកស្នើ លោក ហ៊ុន សែន ឱ្យជួយដោះស្រាយវិវាទដីធ្លី
ក្រុមប្រជាពលរដ្ឋជាង ២រយគ្រួសារ (២៥០) មានជម្លោះដីធ្លីនៅក្បែរតំបន់បឹងតាមោកនៅថ្ងៃទី២៥ ខែធ្នូ ពួកគាត់បាននាំកូនចៅប្រមូលផ្ដុំជួបជុំគ្នានៅតាមមុខផ្ទះរៀងៗខ្លួន ដើម្បីស្រែកតវ៉ាទាមទារយុត្តិធម៌ និងស្នើឱ្យលោកនាយករដ្ឋមន្ត្រី ហ៊ុន សែន ចេញប្លង់កម្មសិទ្ធិ និងកាត់ឆ្វៀលដីចំនួន ៥ហិកតារ ជូនដល់ពួកគាត់។ មន្ត្រីសង្គមស៊ីវិល ស្នើដល់រដ្ឋាភិបាលពន្លឿនការដោះស្រាយវិវាទដីធ្លីនេះប្រកបដោយសន្តិវិធី ជាជាងដេញពលរដ្ឋចេញពីលំនៅឋានទាំងបង្ខំ និងគ្មានផ្ដល់សំណងជូនពលរដ្ឋសមរម្យ។ អានព័ត៌មានពិស្តារ ...
១៨.យុវជនខ្មែរថាវរៈម្នាក់ឈឺធ្ងន់រហូតទៅព្យាបាលនៅស្រុកថៃ ក្រោយធ្វើកូដកម្មបង្អត់អាហារទាមទារយុត្តិធម៌ជូនកញ្ញា សេង ធារី
យុវជនខ្មែរថាវរៈម្នាក់ធ្លាក់ខ្លួនឈឺធ្ងន់រហូតទៅព្យាបាលជំងឺនៅមន្ទីរពេទ្យប្រទេសថៃ ក្រោយពេលធ្វើកូដកម្មបង្អត់អាហារដួលសន្លប់នៅនឹងកន្លែង ដើម្បីទាមទារឱ្យរដ្ឋាភិបាល និងតុលាការដោះលែងកញ្ញា សេង ធារី និងអ្នកជាប់ឃុំផ្សេងទៀតដែលត្រូវបានចោទប្រកាន់ក្រោមហេតុផលនយោបាយដោយអយុត្តិធម៌។ មន្រ្តីសង្គមស៊ីវិលចាត់ទុកសកម្មភាពយុវជននោះ គឺជាការលះបង់ធំធេងក្នុងបុព្វហេតុយុត្តិធម៌សង្គម ហើយអំពាវនាវឱ្យរដ្ឋាភិបាលងាកមកស្តារប្រជាធិបតេយ្យ និងគោរពសិទ្ធិមនុស្ស។ អានព័ត៌មានពិស្តារ ...
១៩.ជនភៀសខ្លួនខ្មែរក្រោម បោះឆ្នោតរើសប្រធានគណ : កម្មការថ្មី នៅប្រទេសថៃ
ជនភៀសខ្លួនខ្មែរក្រោមនៅប្រទេសថៃ ជាងមួយរយនាក់បានប្រមូលផ្ដុំគ្នានៅជាយក្រុងបាងកក ដើម្បីបោះឆ្នោតជ្រើសរើសប្រធានគណៈកម្មការថ្មី សម្រាប់អាណត្តិទី៨ នៅរសៀលថ្ងៃទី២៥ ខែធ្នូ ដើម្បីដឹកនាំសមាគមជនភៀសខ្លួនខ្មែរក្រោម។ សមាគមនេះ តែងតែជួយសម្រួលដល់ខ្មែរក្រោម ដែលភៀសខ្លួនមកថៃ ឲ្យមានទីជម្រក មានការងារធ្វើ ជួយគ្នាក្នុងគ្រាទុក្ខលំបាក ដូចជាចែករំលែកស្បៀងអាហារគ្នា រួមគ្នាធ្វើបុណ្យប្រពៃណីផ្សេងៗ និងបើកថ្នាក់បង្រៀនអក្សរខ្មែរ ដល់កូនខ្មែរជាដើម។ អានព័ត៌មានពិស្តារ ...
២០.ប្រជាពលរដ្ឋជិត៣០នាក់ បន្តទាមទារឱ្យរដ្ឋាភិបាលបញ្ឈប់ការផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍ខុសច្បាប់
ប្រជាពលរដ្ឋ និងយុវជនសកម្មជិត៣០នាក់ បន្តទាមទារឱ្យរដ្ឋាភិបាលបញ្ឈប់ផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍ខុសច្បាប់ និងមិនត្រូវបង្រៀនអក្សរសាស្ត្រវៀតណាមនៅសាកលវិទ្យាល័យភូមិន្ទភ្នំពេញ។ មន្ត្រីអង្គការសង្គមស៊ីវិលយល់ថា ការទាមទាររបស់ក្រុមប្រជាពលរដ្ឋទាំងនេះ មិនមែនជាការរើសអើងជាតិសាសន៍នោះទេ ក៏ប៉ុន្តែជាការជំរុញឱ្យមានការអនុវត្តច្បាប់។ អានព័ត៌មានពិស្តារ ...
២១.ថៃបានសង្គ្រោះអ្នកនេសាទខ្មែរម្នាក់ដែលលិចទូកដោយខ្យល់ព្យុះ ក្នុងឈូងសមុទ្រថៃ
ពលករនេសាទខ្មែរម្នាក់ ត្រូវបានទូកថៃជួយសង្គ្រោះជីវិត បន្ទាប់ពីទូករបស់គាត់ បានលិចនៅក្នុងឈូងសមុទ្រថៃភាគខាងត្បូង ក្នុងខេត្តសុងក្លា (Song Khla) ដោយសារខ្យល់ព្យុះ ហើយគាត់អណ្ដែតក្នុងសមុទ្រជាមួយនឹងសាកសពពលករនេសាទបីនាក់ទៀត ដែលគាត់បានចងភ្ជាប់នឹងខ្លួនដោយខ្សែពួរកុំឲ្យបែកគ្នា។ ហេតុការណ៍លិចទូកនេះ កើតឡើងកាលពីថ្ងៃទី១៨ ខែធ្នូ កាលពីចុងសប្ដាហ៍មុន។ អានព័ត៌មានពិស្តារ ...
២២. ពលរដ្ឋមួយចំនួនរិះគន់គ្រូពេទ្យថា មិនសូវយកចិត្តទុក្ខដាក់ព្យាបាលជំងឺដល់អ្នកប្រើប្រាស់ប័ណ្ណបេឡាជាតិរបបសន្តិសុខសង្គម
ពលរដ្ឋមួយចំនួន រិះគន់គ្រូពេទ្យ ថាមិនសូវយកចិត្តទុកដាក់ព្យាបាល អ្នកជំងឺដែលប្រើប្រាស់ប័ណ្ណបេឡាជាតិរបបសន្តិសុខសង្គម ហៅកាត់ថា ប.ស.ស នោះទេ។ មន្ត្រីសង្គមស៊ីវិល យល់ឃើញថា ក្រសួងសុខាភិបាល គួរមានវិធានការច្បាស់លាស់លើបញ្ហានេះ និងត្រូវទប់ស្កាត់អំពើពុករលួយដែលអាចប៉ះពាល់ដល់អាយុជីវិតពលរដ្ឋ។ អានព័ត៌មានពិស្តារ ...
២៣ . ដំណើរកម្សាន្តតាមឡូរីនៅខេត្តបាត់ដំបង កំពុងទាក់ទាញភ្ញៀវទេសចរទស្សនា
តំបន់ទេសចរណ៍ឡូរីជើងភ្នំបាណន់ ខេត្តបាត់ដំបង កំពុងទាក់ទាញភ្ញៀវទេសចរជាតិ និងអន្តរជាតិ ទៅកម្សាន្តជាហូរហែរ បន្ទាប់ពីមានការរៀបចំបន្ថែមឱ្យក្លាយជារមនីយដ្ឋានកែច្នៃ អមជាមួយធម្មជាតិ។ មន្ត្រីសង្គមស៊ីវិល ជំរុញឱ្យមន្ទីរទេសចរណ៍ខេត្ត បង្កើនការផ្សព្វផ្សាយ និងពង្រឹងសេវាកម្ម ហើយបង្កើតអ្វីដែលថ្មីបន្ថែមទៀត ដើម្បីរក្សានិរន្តរភាពតំបន់ទេសចរណ៍ និងលើកកម្ពស់ជីវភាពប្រជាជននៅតំបន់នោះ។ អានព័ត៌មានពិស្តារ ...
២៤ . អង្គការសង្គមស៊ីវិលប្រកាសអាសន្ន ក្រោយពីសត្វផ្សោតទន្លេមេគង្គងាប់ជាង ១០ក្បាលទៀត ក្នុងឆ្នាំ២០២២
ក្រុមអង្គការសង្គមស៊ីវិល បានប្រកាសអាសន្នបង្ហាញពីការផុតពូជសត្វផ្សោតដ៏កម្រ ក្នុងអាងទន្លេមេគង្គ ខេត្តក្រចេះ។ ការលើកឡើងនេះ ក្រោយពីសត្វផ្សោតជាង ១០ក្បាលទៀត ងាប់ជាបន្តបន្ទាប់ ក្នុងឆ្នាំ២០២២ នេះ ដោយសារភាពធូររលុងនៃការអនុវត្តច្បាប់នេសាទ ហើយទាមទារឱ្យអាជ្ញាធររដ្ឋាភិបាលប្រញាប់ពង្រឹងអនុវត្តច្បាប់នេសាទ។ អានព័ត៌មានពិស្តារ ...
២៥ . បក្សភ្លើងទៀនថា មេឃុំបក្សកាន់អំណាចនៅតែបំពានតួនាទី និងរើសអើងសមាជិករបស់ខ្លួន
មន្ត្រីជាន់ខ្ពស់គណបក្សភ្លើងទៀនលើកឡើងថា មេឃុំគណបក្សកាន់អំណាចមួយចំនួនមិនប្រគល់តួនាទីភារកិច្ចទៅតាមច្បាប់កំណត់ឱ្យទៅក្រុមប្រឹក្សាឃុំ-សង្កាត់ មកពីគណបក្សភ្លើងទៀននៅឡើយទេ។ ពួកគេចាត់ទុកទង្វើនេះ គឺជាការរំលោភច្បាប់ និងរើសអើងនយោបាយ។ ទោះបីជាយ៉ាងណា មន្ត្រីគណបក្សកាន់អំណាចច្រានចោលការចោទប្រកាន់នេះ។ អានព័ត៌មានពិស្តារ ...
២៦ . អ្នកជំនាញអង្គការសហប្រជាជាតិដាក់សំណួរទៅវៀតណាមរឿងរំលោភសិទ្ធិមនុស្សខ្មែរក្រោម
មន្ត្រីជំនាញអង្គការសហប្រជាជាតិ សំដែងក្តីបារម្ភពីរបាយការណ៍ដែលរដ្ឋាភិបាលវៀតណាម បានរំលោភសិទ្ធិមនុស្ស និងសិទ្ធិជាមូលដ្ឋានផ្សេងទៀត របស់ជនជាតិដើមខ្មែរកម្ពុជាក្រោម។ ពួកគេសំណូមពរឲ្យវៀតណាមគោរពកាតព្វកិច្ចរបស់ខ្លួនដែលជាសមាជិកនៃក្រុមប្រឹក្សាសិទ្ធមនុស្សរបស់អង្គការសហប្រជាជាតិ។ អានព័ត៌មានពិស្តារ ...
២៧ . លោក ហ៊ុន សែន អំពាវនាវឱ្យពលរដ្ឋគោរពច្បាប់ចរាចរណ៍ ខណៈសង្គមស៊ីវិលថា ការអនុវត្តច្បាប់ចរាចរមានភាពមិនស្មើគ្នា រវាងអ្នកមាន និងអ្នកក្រ
មន្ត្រីសង្គមស៊ីវិលរិះគន់ថា ការអំពាវនាវរបស់លោកនាយករដ្ឋមន្ត្រី ហ៊ុន សែន ឱ្យពលរដ្ឋគោរពច្បាប់ចរាចរណ៍ ហាក់គ្មានប្រសិទ្ធភាពឡើយ ដរាបណាមន្ត្រីជំនាញនៅតែអនុវត្តច្បាប់មានស្ដង់ដារពីរ រវាងអ្នកមាននិងអ្នកក្រ។ ពួកគាត់ថា បើការអនុវត្តច្បាប់នៅតែមិនស្មើភាពគ្នាបែបនេះ នោះប្រជាពលរដ្ឋនឹងអស់ជំនឿលើរដ្ឋាភិបាល និងធ្វើឱ្យការបំពានច្បាប់បង្កឡើងដោយអ្នកមានលុយ មានអំណាច មានចំនួនកាន់តែច្រើនឡើងជាមិនខាន។ អានព័ត៌មានពិស្តារ ...
២៨ . ជនភៀសខ្លួនខ្មែរម្នាក់សុខចិត្តរស់បែកក្រុមគ្រួសារធ្វើនយោបាយជាមួយបក្សប្រឆាំងទាមទារឱ្យមានប្រជាធិបតេយ្យនៅកម្ពុជា
ជនភៀសខ្លួនខ្មែរម្នាក់ជាសកម្មជនគណបក្សភ្លើងទៀនសុខចិត្តរស់នៅឆ្ងាយពីប្រពន្ធកូនតស៊ូធ្វើនយោបាយដើម្បីទាមទារលទ្ធិប្រជាធិបតេយ្យនៅកម្ពុជា។ មន្ត្រីរដ្ឋាភិបាលថា ជនភៀសខ្លួនដោយសារនយោបាយហើយរត់ទៅក្រៅប្រទេសមកពីពួកគេប្រព្រឹត្តខុសច្បាប់។ មន្ត្រីសង្គមស៊ីវិលថា រដ្ឋាភិបាលគួរតែសម្រួលឲ្យមានភាពធូរស្រាលផ្នែកនយោបាយ ដើម្បីសេចក្ដីសុខរបស់ពលរដ្ឋ។ អានព័ត៌មានពិស្តារ ...
២៩ . អ្នករស់លើគំនរសំរាមក្នុងរាជធានីភ្នំពេញតស៊ូចិញ្ចឹមជីវិតដោយលំបាក
ប្រជាពលរដ្ឋក្រីក្រ គ្មានទីពឹងរាប់ពាន់នាក់កំពុងតស៊ូរើសសំរាមឬអេតចាយក្នុងរាជធានីភ្នំពេញយកទៅលក់ដើម្បីបានប្រាក់ទិញម្ហូបអាហារចិញ្ចឹមជីវិតពីមួយថ្ងៃទៅមួយថ្ងៃ។ពលរដ្ឋទាំងនោះត្អូញត្អែរពីការលំបាកផ្នែកជីវភាពនិងបញ្ហាសុខភាពក្នុងការងាររើសសំរាមនិងរស់នៅក្បែរគំនរសំរាម។ ពួកគាត់ថា សព្វថ្ងៃរស់ដោយពឹងលើកម្លាំងពលកម្មខ្លួនឯងទាំងស្រុងដោយគ្មានការយកចិត្តទុកដាក់ពីសំណាក់រដ្ឋាភិបាលនោះទេ។
៣០ . ពលរដ្ឋខេត្តកណ្ដាលជាង ២០០នាក់ តវ៉ាឱ្យអាជ្ញាធរខេត្តបំភ្លឺរឿងបង្ខំឱ្យរុះរើផ្ទះ
ពលរដ្ឋជាង ២០០នាក់ តំណាងឱ្យពលរដ្ឋ ៤៧៣គ្រួសារ ដែលរងផលប៉ះពាល់ពីគម្រោងសាងសង់វាលយន្តហោះថ្មី នៅថ្ងៃទី២៧ ធ្នូ បន្តលើកគ្នាតវ៉ាជាថ្មីទៀត នៅសាលាខេត្តកណ្ដាល ដើម្បីទាមទារឱ្យអាជ្ញាធរបំភ្លឺករណីដាក់ឱសានវាទឱ្យពលរដ្ឋរុះរើផ្ទះ និងហាមពួកគាត់មិនឱ្យសាងសង់លំនៅឋានលើដីរបស់ខ្លួន។ អានព័ត៌មានពិស្តារ ...
៣១ . ទុក្ខលំបាកកូនសកម្មជនបក្សប្រឆាំង លោក សុខ ចន្ថា ក្រោយពីម្ដាយស្លាប់ចោល និងឪពុកកំពុងជាប់គុក
កូនប្រុសសកម្មជនបក្សប្រឆាំងម្នាក់នៅខេត្តព្រៃវែងដែលឪពុករបស់ខ្លួនកំពុងជាប់ឃុំក្នុងពន្ធនាគារអស់ជិត៣ឆ្នាំនោះបានរងទុក្ខផ្ទួនៗនៅក្នុងគ្រួសារ ខណៈ ម្តាយឈឺចិត្តធ្លាក់ខ្លួនឈឺស្លាប់ចោលប្តីនិងកូនជាទីស្រឡាញ់។ បើទោះបីស្ថិតក្នុងគ្រាលំបាកបែបនេះក្តីពួកគេបានពុះពារគ្រប់ឧបសគ្គតស៊ូដោយប្រកបរបរដើរលក់លៀសនិងសណ្តែកដីស្ងោរដើម្បីរកប្រាក់ផ្គត់ផ្គង់គ្រួសារ។ មន្ត្រីសង្គមស៊ីវិលយល់ថា រដ្ឋាភិបាលល្មមដល់ពេលបញ្ចប់វិបត្តិនយោបាយនិងបើកឱកាសឱ្យពលរដ្ឋគ្រប់និន្នាការនយោបាយមានសេរីភាពនិងរស់នៅជួបជុំក្រុមគ្រួសារឡើងវិញ។
៣២ . កូដករក្រុមហ៊ុនណាហ្គាវើលដ៍ម្នាក់ចូលបំភ្លឺតុលាការភ្នំពេញតាមការកោះហៅ
កូដករម្នាក់ទៀតនៃក្រុមហ៊ុនកាស៊ីណូណាហ្គាវើលដ៍ (Naga World) បានចូលបំភ្លឺនៅសាលាដំបូងរាជធានីភ្នំពេញតាមកាលកំណត់នៅថ្ងៃទី២៧ខែធ្នូនេះ តាមបណ្ដឹងរបស់ក្រុមហ៊ុនក្រោយពីរូបគាត់ចូលរួមធ្វើកូដកម្មអហិង្សាទាមទារដំណោះស្រាយវិវាទការងារដែលអូសបន្លាយពេលជាងមួយឆ្នាំមកនេះ។ មន្ត្រីសង្គមស៊ីវិលនៅតែទទូចដល់តុលាការឱ្យទម្លាក់ចោលការចោទប្រកាន់លើក្រុមកូដករនិងដោះលែងប្រធានសហជីពកញ្ញា ឈឹម ស៊ីថរ ឱ្យមានសេរីភាពឡើងវិញព្រមទាំងដោះស្រាយបញ្ចប់វិវាទការងារមួយនេះ។
៣៣ . ពលរដ្ឋ និងមន្ត្រីសង្គមស៊ីវិលស្នើដល់រដ្ឋាភិបាលរឹតបន្តឹងច្បាប់លើជនជាតិចិនមួយចំនួនដែលល្មើសច្បាប់កម្ពុជា
ពលរដ្ឋ និងមន្ត្រីសង្គមស៊ីវិលព្រួយបារម្ភអំពីឥទ្ធិពលនៃជនជាតិចិនមួយចំនួនបង្កអសន្តិសុខសង្គមនិងចូលមកដណ្ដើមទីផ្សារការងាររបស់ពលរដ្ឋខ្មែរ។ ពួកគាត់ស្នើដល់រដ្ឋាភិបាលរឹតបន្តឹងច្បាប់ចំពោះជនបរទេសណាដែលចូលមកធ្វើជំនួញដែលមិនគោរពច្បាប់កម្ពុជា។ការស្នើនេះ ធ្វើឡើងក្រោយពីក្រសួងទេសចរណ៍ចេញរបាយការណ៍ថា រយៈពេល១១ខែ សម្រាប់ឆ្នាំ២០២២ កម្ពុជាបានទទួលភ្ញៀវទេសចរចិនជាង ៩ម៉ឺននាក់។ អានព័ត៌មានពិស្តារ ...
៣៤ . កសិករចិញ្ចឹមជ្រូករិះគន់ការលើកឡើងរបស់លោក ហ៊ុន សែន ថាតម្លៃជ្រូករស់ធ្លាក់ចុះ គឺស្របទៅតាមការចង់បានរបស់អ្នកបរិភោគ
កសិករចិញ្ចឹមជ្រូកលើកឡើងថាប្រសាសន៍របស់លោកនាយករដ្ឋមន្ត្រីហ៊ុន សែន ដែលថា តម្លៃជ្រូករស់ធ្លាក់ចុះដើម្បីស្របទៅតាមការចង់បានរបស់អ្នកបរិភោគនោះគឺជាការបកស្រាយមិនសមហេតុផល។ពួកគាត់ឱ្យដឹងថាបច្ចុប្បន្នការនាំចូលជ្រូកពីក្រៅប្រទេសមានភាពលើសកម្រិត។
៣៥ . សាលាឧទ្ធរណ៍ភ្នំពេញសម្រេចតម្កល់សាលដីកាលើសំណុំរឿង កញ្ញា ឈឹម ស៊ីថរ ទុកជាបានការដដែល
សាលាឧទ្ធរណ៍ភ្នំពេញនៅថ្ងៃទី២៨ ខែធ្នូ បានសម្រេចតម្កល់សាលដីកា លើសំណុំរឿងប្រធានសហជីពក្រុមហ៊ុនណាហ្គាវើលដ៍ (Naga World) កញ្ញា ឈឹម ស៊ីថរ តាមការសម្រេចរបស់តុលាការជាន់ទាបទុកជាបានការដដែល។ កូដករមន្ត្រីសង្គមស៊ីវិល និងមេធាវីការពារក្ដីចាត់ទុកការសម្រេចរបស់តុលាការជាន់ខ្ពស់នេះថា ជារឿងអយុត្តិធម៌។ ពួកគាត់ រិះគន់ថា តុលាការគ្មានហេតុផលអ្វីបន្តឃុំខ្លួនកញ្ញា ឈឹម ស៊ីថរ នោះទេខណៈសហគមន៍ជាតិនិងអន្តរជាតិមើលឃើញថា ការចាប់ខ្លួនកញ្ញាជាលើកទីពីរនេះធ្វើឡើងមិនត្រឹមត្រូវតាមច្បាប់។ អានព័ត៌មានពិស្តារ ...
៣៦ . មន្ត្រីសង្គមស៊ីវិលស្នើរដ្ឋាភិបាលដោះស្រាយបញ្ហាចាប់ចងពលរដ្ឋត្រូវអនុវត្តឱ្យមានតម្លាភាព
មន្ត្រីសង្គមស៊ីវិលស្នើទៅរដ្ឋាភិបាល លោក ហ៊ុន សែន គួរដោះស្រាយបញ្ហាចាប់ចងឬការចោទប្រកាន់ពលរដ្ឋឱ្យមានតម្លាភាពនិងកុំប្រកាន់បក្ខពួក។ ការលើកឡើងដូច្នេះ ក្រោយពេលលោកនាយករដ្ឋមន្ត្រីចេញធានាឱ្យបុគ្គលិកទូរទស្សន៍បាយ័នម្នាក់ឱ្យនៅក្រៅឃុំបណ្ដោះអាសន្នករណីលក់ដីខ្យល់តម្លៃជិត៤០លានដុល្លារ។
៣៧ . កូនសកម្មជនព្រៃឡង់ម្នាក់ ប្រឈមបោះបង់ការសិក្សាដោយសារជីវភាពខ្វះខាត ក្រោយពីឪពុកស្លាប់
កូនស្រីសកម្មជនការពារព្រៃឡង់ខេត្តស្ទឹងត្រែងម្នាក់ ប្រឈមបោះបង់ការសិក្សាត្រឹមថ្នាក់ទី១២ ក្រោយពីឪពុកស្លាប់ទៅ ពុំមានអ្នកជួយទំនុកបម្រុង ថវិការៀនសូត្របន្តទៀត។ ក្រុមស្នូលការពារព្រៃឡង់ទទូចដល់សប្បុរសជន មេត្តាផ្តល់ជំនួយមនុស្សធម៌ដើម្បីទ្រទ្រង់ការសិក្សាកូនស្រីអ្នកការពារព្រៃរូបនេះ ដែលកំពុងជួបការលំបាកផ្នែកជីវភាព។ លោក គង់ រី ដែលជាសកម្មជនការពារព្រៃឡង់ដ៏ក្លាហាន បានស្លាប់ដោយសារជំងឺមហារីកក្រពះកាលពីចុងខែតុលា ឆ្នាំ២០២២កន្លងទៅ។ អានព័ត៌មានពិស្តារ...
៣៨ . កសិករដាំមៀនចោទសហគមន៍មៀនប៉ៃលិនបង្កើតកុងត្រាកេងប្រវ័ញ្ច និងទម្លាក់តម្លៃមៀនរបស់ពួកគាត់
កសិករដាំមៀននៅខេត្តប៉ៃលិន និងខេត្តបាត់ដំបង ចោទសហគមន៍មៀនប៉ៃលិនថា ទម្លាក់តម្លៃមៀន ប៉ះពាល់ដល់ជីវភាព។ សង្គមស៊ីវិលយល់ថា ស្ថាប័នជំនាញពាក់ព័ន្ធ គួរចុះត្រួតពិនិត្យ ប្រព័ន្ធសុវត្ថិភាពក្នុងផលិតកម្ម ទាក់ទងកិច្ចសន្យា ដើម្បីជួយដល់កសិករ មុនពេលផលិតទទួលបានតម្លៃជាក់លាក់ និងផ្សព្វផ្សាយព័ត៌មានទីផ្សារកសិកម្មឱ្យបានទូលំទូលាយ។ អានព័ត៌មានពិស្តារ ...
៣៩ . តើមូលហេតុអ្វីបានជាពលរដ្ឋជប៉ុន មានអាយុវែងជាងគេក្នុងពិភពលោក ?
ស្ថិតិអង្គការសុខភាពពិភពលោក (WHO) នៅឆ្នាំ២០២២ បង្ហាញថា ពលរដ្ឋជប៉ុនមានអាយុវែងជាងគេក្នុងពិភពលោក ជាមធ្យមអាយុជាង៨៤ឆ្នាំ (៨៤.៣) ក្នុងនោះស្ត្រីអាចរស់ដល់អាយុ ៨៧ឆ្នាំ ចំណែកបុរសវិញអាយុ៨១ឆ្នាំ។ ចំណែកពលរដ្ឋខ្មែរវិញជាមធ្យមអាចរស់បានដល់អាយុ៧០ឆ្នាំក្នុងនោះស្ត្រីអាយុវែងជាងបុរសគឺ៧២ឆ្នាំរីឯបុរសវិញអាចរស់បានដល់អាយុ៦៧ឆ្នាំ។ អានព័ត៌មានពិស្តារ ...
៤០. ត្រីបឹងទន្លេសាបកើនឡើងជាងឆ្នាំមុនៗ ក្រោយពីរដ្ឋាភិបាលរឹតបន្តឹងការអនុវត្តច្បាប់
ទាក់ទងនឹងទិន្នផលត្រីបឹងទន្លេសាបនៅឆ្នាំនេះវិញ ប្រជាសហគមន៍នេសាទអះអាងថា ក្រោយពីរដ្ឋាភិបាលរឹតបន្តឹង ការអនុវត្តន៍ច្បាប់នេសាទនៅរដូវវស្សាដើមឆ្នាំ២០២២ កន្លងទៅនេះ ទិន្នផលត្រី នៅតំបន់បឹងទន្លេសាប កើនឡើងជាង ឆ្នាំមុនៗ។ ប្រជានេសាទរស់នៅខេត្តបាត់ដំបង និង ខេត្តសៀមរាប បន្តអំពាវនាវឱ្យរដ្ឋាភិបាល ផ្ដោតការយកចិត្តទុកដាក់បន្ថែម ពង្រឹងការអនុវត្តច្បាប់នេសាទនេះ ជាអាទិភាពយូរអង្វែង។ អានព័ត៌មានពិស្ដារ ...
៤១. រដ្ឋាភិបាលមិនទាន់មានវិធានការត្រួតពិនិត្យចំពោះជនជាតិចិនដែលមកកម្ពុជានោះទេ ទោះបីចិនកំពុងផ្ទុះជំងឺកូវីដ - ១៩
ស្របពេលដែលប្រទេសធំៗមួយចំនួនព្រួយបារម្ភ និងចាប់ផ្តើមដាក់ចេញវិធានការតឹងតែង ដើម្បីត្រួតពិនិត្យអ្នកធ្វើដំណើរមកពីប្រទេសចិន រដ្ឋាភិបាលកម្ពុជា អះអាងថា នៅមិនទាន់ មានវិធានការត្រួតពិនិត្យធ្វើតេស្តកូវីដ-១៩តឹងរ៉ឹងចំពោះជនជាជាតិចិនដែលមកលេងនៅកម្ពុជានោះទេ។
អ្នកជំនាញផ្នែកឱសថ និងមន្ត្រីសង្គមវិលថា បើសិនជារដ្ឋាភិបាលមិនមានវិធានការតឹងរ៉ឹងចំពោះលំហូរជនជាតិចិនឱ្យបានត្រឹមត្រូវទេនោះ ពលរដ្ឋកម្ពុជានឹងប្រឈមការឆ្លងជំងឺកូវីដ-១៩ កាន់តែខ្លាំងម្ដងទៀតដែលធ្វើឱ្យគ្រោះថ្នាក់ដល់ពលរដ្ឋនិងប្រទេសជាតិ។
៤២. សង្គមស៊ីវិលរិះគន់សេចក្ដីព្រាងច្បាប់ស្ដីពីចរាចរណ៍ផ្លូវគោកថ្មី ថាគ្មានប្រសិទ្ធភាព បើការអនុវត្តច្បាប់ចរាចរមិនស្មើភាពគ្នា
មន្ត្រីសង្គមស៊ីវិល បារម្ភអំពីការអនុវត្តន៍ច្បាប់ចរាចរណ៍ ដោយពួកគាត់ លើកឡើងថា ទោះបីជាកម្ពុជាមានសេចក្ដីព្រាងច្បាប់ស្ដីពីចរាចរណ៍ផ្លូវគោកថ្មីល្អយ៉ាងណា ក៏ដោយ ក៏ការអនុវត្តន៍ហាក់គ្មានប្រសិទ្ធភាពឡើយ ដរាបណាមន្ត្រីជំនាញនៅតែអនុវត្តច្បាប់ប្រព្រឹត្តអំពើពុករលួយ និងស្តង់ដារពីររវាងអ្នកមាន និងអ្នកក្រ។ ពួកគាត់ថា បើការអនុវត្តច្បាប់នៅតែមិនស្មើភាពគ្នាបែបនេះ នឹងធ្វើអោយប្រជាពលរដ្ឋអស់ជំនឿលើអ្នកអនុវត្តច្បាប់ ហើយការបំពានច្បាប់កាន់តែកើនឡើង។ អានព័ត៌មានពិស្ដារ ...
៤៣. អាជ្ញាធរកំពុងតាមចាប់ឧក្រិដ្ឋជនគ្រឿងញៀនម្នាក់ដែលបាញ់មន្ត្រីប៉ូលិសម្នាក់ស្លាប់ពេលចុះបង្ក្រាប
ពាក់ព័ន្ធឧក្រិដ្ឋជនជួញដូរគ្រឿងញៀនវិញ កម្លាំងសមត្ថកិច្ចនគរបាលជាតិ ចាប់បានឧក្រិដ្ឋជន ៣នាក់ និងកំពុងតាមរកខ្មាន់កាំភ្លើងម្នាក់ទៀតដែលបានរត់គេចខ្លួនភ្លាមៗ ក្រោយដកកាំភ្លើងបាញ់តដៃជាមួយសមត្ថកិច្ច បណ្ដាលឱ្យមន្ត្រីនគរបាលម្នាក់បានស្លាប់ ក្នុងហេតុការណ៍ចុះបង្ក្រាបគ្រឿងញៀន នៅរាជធានីភ្នំពេញកាលពីយប់ថ្ងៃទី២៨ ខែធ្នូ។ អានព័ត៌មានពិស្ដារ ...
៤៤. ប៉ូលិសថៃមិនទាន់ចាប់បានជនបរទេសពីរនាក់ ដែលប្រើហិង្សាលើស្ត្រីវិចិត្រករខ្មែរនៅខេត្តឈុនបុរី
ប៉ូលិសថៃនៅតែមិនទាន់ចាប់បានជនសង្ស័យជាជនបរទេសពីរនាក់ ដែលបានធ្វើទារុណកម្ម និងជះទឹកអាស៊ីតលើស្ត្រីវិចិត្រករខ្មែរ កាលពីដើមខែវិច្ឆិកា កន្លងទៅ នៅខេត្តឈុនបុរី (Chhun Buri) នៅឡើយទេ។ មន្ត្រីសង្គមស៊ីវិលថា ស្ថានទូតខ្មែរនៅប្រទេសថៃ ត្រូវប្រឹងប្រែងសហការជាមួយប៉ូលិសថៃដើម្បីចាប់ជនដៃដល់រកយុត្តិធម៌ឲ្យស្ត្រីខ្មែររងគ្រោះនោះ។ អានព័ត៌មានពិស្ដារ ...
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។